WILLEMSTAD – Un moneda di oro raro di Kòrsou a logra un preis rèkert durante un findishi na Merka. Asina agensia di prensa internashonal ta skirbi. A bende e moneda pa nada ménos ku 390.400 dòler.
Segun e kas di findishi Stack’s Bowers Galleries, nunka promé un moneda di un èks kolonia di Hulanda a trese un suma asina haltu.
E ta un moneda brasileño di 12.800 réis riba kua a haña un stèmpel spesial pa uso na Kòrsou. Rònt aña 1815, moneda na Kòrsou tabata bou di kontròl estrikto. Monedanan ku tabata konsiderá outéntiko a haña un stèmpel pa mustra ku nan tabata aprobá pa usa.
Monedanan falsifiká òf esnan ku tabatin peso ménos ku mester, a wòrdu dirtí mesora. E piesa den findishi ta hopi spesial.
Kasi tur e monedanan konosí ku e mesun stèmpel ta riba moneda brasiliano di 6.400 réis. E piesa akí ta, segun e kas di findishi, e úniko ehemplar konosí ku a keda ku e stèmpel riba un moneda di 12.800 réis.
E moneda ta den un estado remarkabel bon. E stèmpelan ta visibel bon kla i, apesar di algun señal chikí di uso, e balor históriko di e piesa no ta afektá.
E kas di findishi ta indiká ku ta poko biaha ku un moneda nobo di e tipo akí ta sali na kla. Awor, un piesa di historia di Kòrsou tin un nobo rèkert: 390.400 dòler.
