Update: Shofùr lo a pega soño i bai kore riba man kontrali

WILLEMSTAD.-Ambulans mester a transportá dos persona embolbi den e aksidente riba kaminda di Banda Bou, na altura di Gato pa hospital. Manera EXTRA a informa mas tempran, den e aksidente aki un persona a pèrdè su bida. Ta trata di e Shofùr di e outo di famia kende tabata den outo ku un yu chikitu. E yu a haña kap su kabes i p’esei mester a transportá e mucha aki ku urgensia pa hospital. E Shofùr di e pikòp tambe a keda transportá pa Poli pa tratamentu.

Informashon ku EXTRA a kompilá na e sitio ta mustra ku Shofùr di e pikòp lo  a pega soño bou di stür. Tin indikashon ku for di algun meter promé e lo a pega soño i bai kore na man kontrali ku e konsekuensia ya menshoná.

…Un ratu pasá a kaba di tuma lugá un aksidente di tráfiko riba kaminda pa Banda Bou, na altura di Gato. Ta trata di un aksidente entre un pikòp i un outo di famia. Mesora ku sentral di polis a risibi e informashon a manda patruya i tambe ambulans. Na e sitio EXTRA a tuma nota di sigur 3 ambulans pa asina por duna asistensia na víktimanan.

Sin embargo ya kaba por indiká ku un di e personanan embolbi den e aksidente aki a pèrdè su bida. Personal di ambulans ku  a yega na e sitio a hasi lo maksimo pero nan no a logra. E motibunan di e aksidente no ta muchu kla ainda, miéntras ku EXTRA ta warda i no ta publiká nòmber dje víktima teniendo kuenta ku outoridatnan mester por lokalisá i informa famia promé. Pas na su alma i forsa na e famia. EXTRA su rekomendashon na tur outomobilista riba tur kaya di Kòrsou ta pa sea prudente i manehá bo vehíkulo ku e koutela nesesario.

LAGA UN KOMENTARIO

Please enter your comment!
Please enter your name here