MPB a gana elekshon na Boneiru

Kontrali na deseo di lidernan polítiko mester bolbe forma koalishon

KRALENDIJK.- Pueblo di Boneiru a bai elekshon ayera djarason 20 di mart. E resultadonan final a drenta hopi lat kompará ku elekshonnan den pasado riba e isla. E partido Movementu di Pueblo Boneriano (MPB) ku e lider Elvis Tjin Asjoe a gana elekshon, sigui pa Partido Democratico Boneriano (PDB) i na di tres lugá Union Patriotico Boneriano (UPB).

E elekshon a kaba bon ounke for di tempran por a tende e reklamo ku ta tarda hopi pa hendenan vota. E situashon ei a sigui desaroyá di manera ku den oranan lat di anochi urnanan no por a sera na e ora kustumbrá debí ku te lat tabatin hopi hende den rei pa vota. For di e resultado di e promé urnanan ku a drenta despues di konteo por a nota ku MPB i PDB tabata den un bataya basta fuerte. A kaba di konta voto despues di 5’or di mardugá.

E resultado ta ku MPB a logra 3576 voto ku ta representá algu mas ku 40% di e total di votonan. Partido PDB, ku e lider Clarck Abraham, a logra 2130 voto ku ta representá alrededor di 23% i na di tres lugá a keda UPB ku e lider James Kroon ku 1798 voto. E lista Era Nobo ni e partido nobo di Robby Beukenboom, eks dirigente di PDB, Santana, Union pa Pueblo, FSP i Susy no a logra asiento. Pues e 9 asientonan ku Konseho Insular di Boneiru tin a keda repartí 4 pa MPB, 3 pa PDB i 2 asiento pa UPB.

SABA

Saba tambe komo otro dje islanan ku ta parti di BES, tabatin elekshon ayera. Kuater organisashon a bai elekshon i e resultado ta lo siguiente. WIPM ku e lider R. Wilson a logra 779 voto, SLP ku e lider M. Wilson a logra 123 voto, Blank List (UPM) a logra 80 voto i Dave Levenstone a logra 80 voto. Esaki ta nifiká ku tur 5 asiento den Konseho Insular di Saba a bai pa WIPM.

SHARE

LEAVE A REPLY