NEW YORK, AP.- Un kandela residensial mas grave den vários dékada na New York, aparentemente a kuminsá na momentu ku un mucha tabata hunga ku stof i a ekstendé den algun minüt pa tur piso den un edifisio den bario di Bronx. Esaki a laga 12 morto i kuater persona den estado krítiko riba 28 di desèmber, segun alkalde Bill de Blasio.
E mortonan di djaweps a inkluí muchanan di unu, dos i shete i unu mas ku su edat no a wòrdu revelá. De Blasio a indiká ku e reskatistanan a salba sigur 12 bida.
E komishonado di Departamento di Bombero, Daniel Nigro a bisa ku e kandela ta di “magnitut históriko”, debí na e kantidat di víktimanan fatal . Ekskluyendo e atakenan di 11 di sèptèmber 2001, e kandela mas grave tabata na 1990, na momentu ku 87 persona a muri den un insidente na Bronx.
E kandela a destruí e edifisio di sinku piso promé ku 7’or di anochi.
Thierni Diallo, un agente di seguridat di 59 aña, a bisa ku e tabata drumiendo na momentu ku algun persona a bati na su porta. El a logra sali nèt na ora riba kaya. Algun persona a baha via di e trapi di emergensia den kaso den kandela. Pero e propagashon di kandela tabata asina rápido ku algun no por a ni sali di nan apartamentu.
