MCALLEN, TEXAS, MERKA, AP.- Agentenan di Patruya na Frontera a deskubrí un mucha migrante di 3 aña kanando su so riba un kampo na Texas, despues ku probablemente el a wòrdu bandoná pa trafikantenan di persona na frontera ku México.

E mucha su nòmber i diferente number di telefòn a wòrdu skibí den sapatu di e mucha na momentu ku agentenan a deskubrié, segun indikashon di Ofisina di Duana i Protekshon na Frontera djamars anochi. E agensia merikano a agregá ku a purba lokalisá e mucha su famia i ku e chikitin “no ta papia bon pa por komuniká kuné”.

Probablemente e lo wòrdu transportá pa un sentro pa menornan no kompañá ku ta wòrdu atministrá pa Departamento di Salú i Servisio Humano di Merka.

Un agente di patruya na Frontera a kumpra paña pa e mucha i otro ofisialnan a sinta wak pelíkula i dibertí kuné.

Patruya na Frontera a detené 9.000 menor di edat no kompañá den mart i mas di 20.000 desde yanüari, segun e kantidat di migrantenan ku ta krusa na frontera ta oumentá kompará ku nivelnan resien.

LAGA UN KOMENTARIO

Please enter your comment!
Please enter your name here