Mucha por ta rebelde pasobra nan falta amor

Swinda Albertus Conradus ta un señora di 76 aña ku ta trahando 44 kaba trabou boluntario, tambe ta traha ku grandinan, a organisá Wela Seú i aña pasá el a keda kondekorá ku krus di mérito.

El a nase 16 di yanüari di 3 dia di siman 3 minüt pasá di 3 di atardi. E ta di e tres yu muhé di un famia di 5 yu i e ta hopi orguyoso di a haña e nòmber Swinda ku ta nifiká amor. E tin hopi amor pa tur hende rondó di dje. Swinda a biba serka su wela kaminda el a biba masha hopi kos. El a bai skol na Sta. Rosa, Sta Anaschool i Maria College. For di e tempu ei , bayendo skol sra. Swinda a kuminsá yuda e muchanan di klas mas abou ku nan tareanan di skol. Tempu e tabata biba ku su wela, e mester a lesa korant tur dia pa nan. E tempu ei tabata Union i la Crus i ora e falta un artíkulo nan ta hala su atenshon. Ounke e korant ta bieu e tin di lesa korant pa su tawela i wela.

Na aña 70 Swinda a bai biba Mari Pampoen. El a ripará ku tabata falta hopi aktividat pa hóbennan den bario. El a pidi su kasá pa ban lanta algu pa tene muchanan den bario. Su kasá a kòrd’é ku e ta traha kaba ke men dikon e ta pone mas kos riba su lomba. Riba un 26 di yüli na 76 el a disidí pa kuminsá traha ku mucha. Promé ku e dia ei el a yama tur mayor den bario pa nan skucha su plan. Tur mama a bai di akuerdo kuné i dia 26 di yüli e tabatin 60 mucha ku a bai su aktividat. Swinda su kasá a puntr’é kiko e ta bai hasi ku e muchanan. El a traha un programa pa nan i a repartí e muchanan den 3 kategoria. Muchanan ku tabata siña baila folklóriko, bai Tele Fiesta i esnan mas grandi tabata balia baile moderno. Sra. Swinda i su yu hòmber mes tabata siña e muchanan. Semper e tabata gusta bailamentu i ora e no ta na su kas su yu hòmber tabata atendé ku e muchanan. E tempu ei su yu tabatin 14 aña.

 

18 aña traha ku mucha…

Pa 18 aña largu el a traha ku mucha. El a biaha ku e muchanan, tur kaminda ku e por a bai ku nan. Ora el a bai e kurso kon dil ku hóbennan den e komunidat ku ta rebeldia ku mayornan, gobièrnu di Kòrsou e tempu ei a pidié pa guia algun mucha. Swinda tabata traha pero el a pidi 2 aña di su trabou pa e guia e muchanan. 3 bia pa siman e tabatin grupo di 15 mucha i einan el a yuda e muchanan. El a duna e muchanan hopi amor ku ta loke mucha mester. E ta kòrda un mucha chikí ku awe ta hòmber grandi i ku ta traha na duana, a pidié pa e sinta riba su pia. E mucha a bis’é ku nunka el a sinta riba pia di su mama. El a pidi sra. Swinda pa e sunchi e i a bras’é. Despues e mama a bin puntr’é kiko el a hasi ku e yu pasobra e yu a kambia. “Mi a kontestá ku e kos ku e tin di dun’é ta amor, pasobra esei wela Swinda a dun’é. Nos yunan mester duna nan amor, no pasobra bo ta traha bo no por duna bo yu amor. Mainta bras’é, ora e ta bai skol bis’é pa Dios dun’é salú pe hasi hopi kos den bida. E kos ei ta stimulá e mucha pa e hasi su bèst na skol. Despues di esei mi a disidí di bai para ketu, pero tòg a disidí ku e ta bai traha ku hende grandi pasobra nan tambe ta konta”.

 

Hende grandi tambe ta konta…

Sra. Swinda a disidí dado momentu ku e ta bai traha ku hende grandi pasobra manera el a bisa, nan tambe ta konta. El a bai kuida un señora ku ta kasá di un polis na Dominguito. El a bisa e yu ku e ta den grupo di Janwé pero si Swinda no bai e no ta bai mas. Sra Swinda no tabata den e grupo pero e señora a bai pidi pa Swinda tambe por ta aden. El a mira kon dushi nan ta. Mesora el a bion riba e idea pa un grupo di grandi den su bario tambe.  Swinda a bai te Buena Vista bai lanta grupo di grandi. Pero pastor Simon a bis’é mihó e bai su kas i lanta grupo di dama den su bario, i asina riba un 3 di mart el a kuminsá ku un grupo ku 100 hende grandi.

 

Grupo di grandi den su bario…

Sra. Swinda a bai lanta grupo di grandi den su bario. El a yega na 100 hende. E mes huntu ku otro guianan nan a kana buska e grandinan kas pa kas.. E tempu ei Swinda mes tambe a kaba. Awor sra. Swinda tin 60 hende pasobra tin ku a fayesé i tin tabata malu, pero e ta sintié orguyoso di e trabou di 44 aña ku e ta bai hasi na yüli awor. Durante di e trabounan aki el a haña hopi rekonosementu. E ta kontentu ku el a keda balorá na bida.

 

Ainda ta yuda mucha…

Ainda e tin su grupo di grandi i ta yuda muchanan di skol tambe. E ta yuda muchanan ku tarea di skol i tambe ku spreekbeurt. Swinda ta un ‘leesmoeder’ na diferente skol. Tambe e ta konta kuenta, pasobra e ta skibi kuenta i poesia. 44 aña pasá ora el a kuminsá, ta sèn di dje ku su kasá a organisá tur kos. E ku su kasá ta traha i nan tur dos ta pone mitar di nan salario i huntu ta kumpra tur loke e muchanan mester. Por ehèmpel ora di bai simadan e mes ta kumpra paña i su amistatnan i su kasá tambe ta yuda kose paña pa e muchanan. El a bai Boneiru ku e muchanan i ta solamente 25 florin e muchanan a paga. El a pasa masha dushi ku e muchanan pa 18 aña largu.

 

Muchanan falta amor…

Sra. Swinda ta sinti falta di amor di mama ku yu awendia. Amor di famia. Pero e vírus di Corona awor a pone ku hopi famia a haña otro, hopi yu a haña mama. Den kas e mama ta ripará ku e yu mester di kariño i amor. Famianan ku tabata biba alehá di otro awor a bira uní. E muchanan di awor aki ta rebelde pero e mamanan ku ta traha no ta duna e yu tempu. Sra. Swinda tambe a traha i e tabatin tempu pa su 3 yunan i e 60 muchanan di bario ku e tabata yuda. Su kurason ta habrí e ta yama Dios danki pa e don di amor ku a dun’é. E ta sinti ku e ta duna amor pa yuda. I no solamente mucha, pero den e mundu di awendia nos mester di amor pa otro. Mester tin amor pa próhimo. No wak kiko otro ta hasi pero e wak kiko abo ta hasi pa agradá Dios. P’esei segun sra. Swinda, muchanan awendia por ta rebelde, pero nan falta amor.

Tur hende por hasi algu basta nan ke…

Pa sra. Swinda hende grandi por hasi tur kos sin importá. Nan por basta nan mes ke. Su grupo di hende grandi tur siman nan tin aktividat. Tin siman tin kues pa nan pensa i keda bei, skibi loke bo ta kòrda; nan ta traha kusinchi pa nan mes por sinta riba dje; esun ku no por kose ta yena e kusinchi; nan ta traha obra di man; keiru den konvoi pero tambe kana. I asta gemastik nan ta hasi. Tur último djaweps di luna nan tin gemastik. I asta zumba nan ta hasi. Sea ta para òf sinta pero di un forma òf otro nan ta move. Tur hende por hasi algu basta nan ke. Sra. Swinda tabata den ròl stul i no por a kana. Sinta kòrda riba malesa ta hasi hende mas malu. E ta kòrda kon dia el a sali hospital e tabatin 9 remedi i awor ta un so e ta bebe. No tin nada imposibel pa Dios i no kòrda riba dje ora bo ta malu so, pero tur momentu yama danki.

 

Wela Seú…

I pa mustra ku grandinan tambe por a pone ku sra. Swinda a kuminsá ku Wela Seú. Na 2007 el a puntra dikon nos grandinan tambe no por subi tarima meskos ku e hóbennan. E tabatin 15 hende grandi i esun mas grandi 85 aña. Tur aña nan tin un tema. E ta kòrda ku nan tabatin asta tema di yora morto. Tambe Swinda ta skibi komedia. E ta kòrda ku un komedia tabata di yora morto i nan tabatin mester di un kaha di morto, Nan a kue un djùk grandi blanku, pone un pòpchi drumi den dje i asina a yora morto.

 

Krus di mérito

Aña pasá 2 di yüli sra. Swinda Albertus Conradus a keda kondekorá ku krus di mérito. E tempu ei e tabata den ròl stul, i asina el a bai tuma su rekonosementu. I na momentu ku e tabata bai dilanti bai tuma su rekonosementu e ta tende un señora ta bisa ta kiko un hende den ròl stul por hasi pa haña e rekonosementu ei. El a bai bèk serka e persona sinta i bis’é su number i unda e ta biba i number di telefòn pa e persona ei yam’é pa e sa kuantu kos el a hasi. Sra. Swinda a enfatisá ku no ta pasobra un hende ta den ròl stul ta nifiká ku e no por hasi nada. E ta elogiá e hende ku no por papia bon ni kana bon i ta hasi algu pa bida. Kuantu tin ku por kana i hasi tur kos pero tòg no ta hasi nada.

Pero el a haña masha hopi rekonosementu serka e gruponan di grandinan di Kòrsou. I e ta apresiá ku nan a apresi’é siendo na bida. I ta bon pa hasié pa tur otro hende na Kòrsou, ku ta hopi por sierto, pa apresiá i balornan na bida.

 

Mi telefòn, pèn i papel nunka ta falta…

Swinda a bisa nos ku banda di dje nunka ta falta un pèn, papel i su telefòn. Sinta so sin hasi nada ta poné hende hasi malu i si bo no tin doló, bo ta sinti doló. E ta 24/7 riba Facebook. I p’esei hende ku bista fihá riba Dios mester keda asina. I den su kaso el a bisa ku e ta bou di ala di Dios i e ke keda bou di e alanan ei. E no ta buska Dios ora e ta malu so pero tur ora.

 

 

 

 

SHARE

LEAVE A REPLY