Riba dia Internashonal di mucha

WILLEMSTAD.– Djasabra 20 di novèmber último un sala yen di mucha na Renaissance a sera konosí ku un grupo di kanto hubenil nobo. Roald Balentien huntu ku Analies Hooi ta e motornan tras di e grupo aki, i a skohe konsientemente e dia spesial di nos muchanan pa lansa e grupo.

ZING, ku ta nòmber di e grupo, lo trese kansionnan spesial pa muchanan te ku 12 aña. Kansionnan prinsipalmente na Papiamentu ku tema ku e mucha por identifiká su mes kuné.

Na e okashon di e lansamentu muchanan a disfrutá di un show presentá totalmente pa mucha. Primeramente Ingelor Keller huntu ku su yu Gabrielle Lichtenberg tabata maestro di seremonia. E atardi a start ku DJ Alexzia di apénas 10 aña pa sigui despues ku D`art pa mucha, Kirsten Mare, Sontje Mercelina i Rei di tumba Hubenil Chrysander Leonora.

Analies Hooi a hiba palabra pa presentenan i splika ku ZING ta un soño di tantu Roald Balentien, Analies i Angelies Hooi. Tambe a hiba palabra e padrinu di e grupo, Gilbert Doran, kende a ekspresá su alegria di por konta ku ZING despues ku hopi tempu no tabatin grupo di tal índole den farándula di Kòrsou.

E atardi a kulminá na momentu ku ZING a presentá tantu nan tema musikal: `Nos ta ZING` i tambe nan promé kansion `Happy Birthday song ZING`. Ambos skibí pa Roald Balentien i ku areglo di Derrel `Titi` De Palm. Mixing a tuma lugá serka konosido músiko Anthony Hooi.

ZING ta konsistí di 9 integrante ku ta kla pa presentá na pueblo di Kòrsou kansionnan di mucha pa nan por kanta, baila i dibertí. For di e siman aki por kuminsá skucha e promé kansion aki na bo radio preferí tambe por bishita nan página di media sosial ku ta Zing_curacao riba Instagram i ZING riba Facebook.

 

LAGA UN KOMENTARIO

Please enter your comment!
Please enter your name here