WILLEMSTAD.- 27 i 28 di mei 2026, ku hopi orguyo i alegria ta partisipá un logro mas na Blenchischool. Muchanan di e programa di kushina a pasa nan eksámen ku éksito. E momento aki no solamente ta mustra nan talento, sino tambe nan perseveransia, determinashon i amor pa siña i traha den tim.
Tur aña e proyekto aki tin un impakto profundo riba e muchanan ku tin nan retonan. Pa hopi di nan, e eksperensia di prepará, kushiná i logra nan meta a bira un paso grandi den nan desaroyo personal. Nan a siña tin konfiansa den nan mes, traha huntu komo ekipo, i keda orguyoso di loke nan por logra. Pa mayornan ku a presensiá e momentu aki, tabata un eksperensia hopi emoshonal, un prueba kla ku nan yunan por bria i logra kosnan grandi. Pero esaki por solamente si mayornan kere den nan yunan i stimulá nan.
Direktiva di skol ta mustra nan gradisimentu profundo na yùfrou Sharon Paola i yùf Liseth Mars ku a yuda den e trayektoria aki ku amor i dedikashon den kada paso. Tambe un danki spesial na mener Malcolm Helmijr, ku ta sigui pone su kurason i alma den e proyekto bunita aki, hasiendo un diferensia real den bida di e alumnonan.
Ayera tabata un dia di éksito pa kada un di e muchanan aki, un triunfo ku lo keda grabá den nan bida pa semper.
Tambe gradesimentu na MCB Bank i Landsloterij i mayornan ku a kontribuí finansieramente pa hasi e proyektonan aki bira realidat. Sin nan sosten e tipo di logronan aki lo no tabata posibel.
Danki di kurason na tur hende ku a aportá na e éksito aki. Huntu ta sigui traha pa un futuro mihó pa nos muchanan.
