E situashon di bida den Zùit Sudan ta realmente malu, ku parti grandi dje poblashon bibando den miseria i ta desnutrí./em>
NAIROBI, Kenia (AFP).- Hamber ta obligá muchanan i famianan kompleto di Zùit Sudan, un pais ku ta biba den krísis humanitario, pa kome blachi i tambe leli di awa pa sobrebibí, segun e organisashon britániko Save the Children. E situashon ta krítiko den e estado di Jonglei, kaminda trupanan di gobièrnu leal na e presidente Salva Kiir ta enfrentá milisianan ku ta pro su rival Riek Machar, un eks visepresidente ku ta den aresto na kas.
Élite di polítika a hòrta míles di miónes di dòler di estado, segun Nashonnan Uní i otro agensianan, lagando un dje poblashonnan di mas pober na mundu sin servisio.
Na algun parti (Jonglei), e famianan i muchanan ta sobrebibí ku blachi i leli di awa i simianan di mata ku nan a warda pa sembra”, di akuerdo ku Save the Children den un komunikado. “Mamanan ta kana durante di oranan largu den mondinan pa haña algu pa nan yunan kome”, segun e organisashon.
Mas ku 7.8 mion hende di Zùit di Sudan ta sufri di hamber serio miéntras ku na partinan dje pais hendenan ta na rant pa kuminsá muri di hamber, segun sifranan di un klasifikashon dje fasenan di desnutrishon. Peleanan a pone ku algun shen mil hende mester a bandoná nan kas den e pais mas hóben na mundu, pero tambe un di esnan mas korupto i pober apesar di reservanan enorme di petrolio.
Pa Chris Nyamandi, direktor di Save the Children den Zùit Sudan, e situashon por bira te hasta mas serio teniendo kuenta ku ta pará na komienso dje temporada di áwaseru. Un otro preokupashon ta e echo ku hopi mucha demasiado débil pa motibu di hamber, mester a bandoná skol. Algun di nan a haña nan mes obligá pa bai traha òf kasa.
Zùit Sudan a drenta un guera sivil entre 2013 i 2018, loke a destruí e pais. E konflikto aki a kousa mas ku 400.000 morto i kuater mion hende ku mester a buska otro kaminda pa biba.
