BANGKOK, AP.- E 12 muchanan huntu ku nan entrenadó di futbòl ku a wòrdu reskatá den un kueba inundá na nort di Tailandia ta kla pa sali for di e pais. E grupo a keda pegá durante kasi tres siman den e kueba. E grupo lo biaha pa Argentina pa reuní ku otro muchanan ku ta hunga futbòl i despues lo realisá un gira kòrtiku den Merka.
E integrantenan di e ekipo di futbòl Jabalis, kual a wòrdu reskatá na komienso di yüli, mester sali djárason anochi pa kuminsá nan biahe di 17 dia.
E muchanan a mantené nan mes for di sentro di atenshon durante seis luna pa kuida di kualkier trouma sikológiko ku nan por tin. Pero e gobièrnu militar di Tailandia, ansioso pa kompartí su gloria, a saka nan pa lusi den presentashonnan públiko i entrevistanan. Ademas, nan a negoshá e posibilidat pa un pelíkula. E gobièrnu básikamente a asumí e funshon di direktor di e bida públiko di e muchanan ora nan ta for di kancha.
Segun e bosero di gobièrnu Weerachon Sukoondhapatipak, e propósito di e biaha aki “no ta pa hiba e muchanan riba un fakansi pero pa mustra mundu kon ta bayendo ku nan”. El a splika ku e biahe ta un oportunidat pa e muchanan ku ta gradisí sobra parti di mundu pa e esfuerso internashonal di reskate.
