WILLEMSTAD.- Riba dianan 18 i 19 di yüli, Ministerio di Finansa na Pietermaai 17 lo ta temporalmente será pa públiko pa motibu di mudansa.
Ministerio di Finansa ta informá ku en konekshon ku renobashon i mantenshon grandi na e edifisio di Ministerio di Finansa na Pietermaai 17, algun departamento i servisio di e ministerio lo muda pa Asteroïdenweg 1-5. E departamento i servisionan lo kompartí edifisio ku SOAB miéntras trabounan di renobashon ta tuma lugá.
Riba djaweps 18 i djabièrnè 19 di yüli próksimo ta kuminsá ku e mudansa i ofisina di Finansa lo ta temporalmente será pa públiko. Djaluna, 22 di yüli ta kuminsá bèk ku servisio na públiko na e lokalidat nobo na Asteroïdenweg 1-5.
Ta importante pa tur ku ta ofresé servisio na Gobièrnu tene kuenta ku por entregá faktura i bestelbon te ku 17 di yüli na Pietermaai 17 i entrante 22 di yüli por hasi esaki na e lokalidat nobo na Asteroïdenweg 1-5.
Servisionan di registro di tèstamènt lo permanesé na Pietemaai 17 te un siguiente aviso.
Departamentonan di Ministerio di Finansa lo mantené mesun number di telefòn i ta keda aksesibel via e e-mailnan ya konosí.
