PARIS (AFP).- Hustisia franses a apsolvé dos muhé kendenan a skirbi riba retnan sosial ku Brigitte Macron, kasá dje presidente Emmanuel Macron, ta un transeksual, un rumor ku a bira viral te hasta na Merka.
E kuestionamentu di sekso biológiko di kasánan di mandatarionan òf di eks promé ministernan ta un táktika di mal informashon usá riba retnan sosial pa ataká lidernan polítiko.
E eks promé minister neozelandes Jacinda Ardern, e eks promé dama norteamerikano Michell Obama òf Begoña Gómez, kasá dje presidente di gobièrnu spañó Pedro Sanchez, tur tabata blanko di tipo di rumornan ei.
For di momento di elekshon di Macron den 2017, teorianan di konspirashon riba retnan sosial ta sigurá ku Brigitte nunka a eksistí, sino ku su ruman Jean-Michel Trogneux a atkerí e identidat despues di a kambia di sekso.
E muhénan husgá a kontribuí pa plama e rumor ei den 2001 durante di un “entrevista” largu riba kanal di YouTube di e ”medium” Amandine Roy, i dje periodista independiente Natacha Rey.
Den su kombersashon riba e “mentira di estado”, tur dos a papia di operashonnan ku Brigitte Macron a hasi, miéntras ku tambe nan ta sigurá ku e no ta mama di nan tres yunan i nan a duna detayenan personal di su ruman hòmber.
Den luna di sèptèmber, hustisia a kondená tur dos na paga 8.000 euro na e kasá dje presidente i 5.000 euro na Jean-Michel Trogneux, pa difamashon.
Pero, nan a apelá e sentensia i tribunal di apelashon a apsolvé nan. E abogado dje denunsiantenan, Jean Ennochi, no ta di akuerdo ku e desishon i a anunsiá di lo studia e siguiente paso pa tuma.
