Akshon di protesta na Suráfrika kaminda ku diariamente tin hopi kaso di violensia kontra di hende muhé, inkluso numeroso asesinato.
KEMPTON PARKE, Suráfrika (AFP).- Algun shen hende muhé kendenan ta
‘jog’ a reuní djasabra último na Johannesburg pa rindi homenahe na un señora asesiná miéntras ku e tabata kore i a reklamá medidanan teniendo kuenta ku e kantidat di hende muhé ku ta keda asesiná den e pais.
“Nos no mester bira kara. Nos mester protehá nos mes na tur momento. Nos ke rekuperá nos kayanan”, segun Hlompho Matji, un analista di datonan di 47 aña ku ta biba den e mesun bario ku e víktima. “Hinter siman pasá mi no a kore. Nos a bira paranoya, nos tin miedu”, segun el a agregá koriendo.
E rekorido a pasa na e sitio kaminda dia 12 di sèptèmber a haña e kurpa di Elizabeth Moselakgomo, di 38 aña, bon konosí serka grupo di koredónan di Kempton Park, den parti ost di Johannesburg.
E mama di un mucha muhé di ocho aña, ku e so a kria, ta un dje nuebe hendenan muhé haña morto den e region for di 15 di yüli.
Ounke ku e pais ta registrá un promedio di mas ku 60 asesinato pa dia, e krímennan aki ta kousa konmoshon i miedu spesial entre hendenan muhé pa posibel presensia di un asesino ku ta mek riba hende muhé. Den e último dianan a organisá enkuentronan di konsentrashon na diferente punto dje pais, for di Kempton Park te Kaapstad, bou di mesun lema: “Basta!”
Polis no ta splika si ta buska un asesino ku a mata hopi hende òf vários kriminal responsabel. E investigashon ta establesé ku algun dje víktimanan no a keda asesiná na e sitio kaminda nan kurpa a aparesé.
E violensia kontra di hende muhé ta un problema hopi serio den Suráfrika. Segun Nashonnan Uní, un di kada tres hende muhé ta sufri di violensia físiko òf seksual durante di nan bida.
“Nan ta hòrtando nos libertat i e konfiansa ku nos mester tin den nos mes”, segun Busisiswe Pakati, ingeniero informátika di 53 aña kende tambe gusta ‘jog’. Awor ta resultá ku esaki tin su peligernan real den e pais.
