WILLEMSTAD.- Durante kasonan di mula e akusado femenino J.W. (24) a presentá den sala di korte pa su kaso keda tratá. E ta keda akusá di a trata na eksportá un kantidat di 116 gram di koka via pakete nan di pòst. Segun J.W. el a haña e pakete serka un hòmber deskonosí ku e sa mira na un toko. E hòmber a aserk’é un dia i a pidié pa hasié e fabor pa pòst e pakete pe, dor ku e no tabatin algu pa identifiká su mes huntu kuné. El a bisa ku e hòmber a ofres’é 100 florin pa e fabor pa e hinka den su saku. Segun e akusado e konosé e hòmber pa kara pero no sa nada mas di dje. Fiskal a duna di konosé ku durante detenshon di e akusado el a deklará otro kos. Segun fiskal e no a papia nada di e hòmber ku a ofresé pa pòst pakete. Riba esaki e akusado a bisa ku e loke el a deklará dilanti hues esei ta e bèrdat. Fiskal a haña e akusashon probá i a demandá e akusado na 9 luna kompletamente kondishonal ku un periodo di prueba di 3 aña.
Hues den su desishon no a mira motibu pa desviá i a bai kompletamente di akuerdo ku e demanda di fiskal.
