HALLE (AFP).- Hustisia aleman a kondená Björn Höcke, un dje polítikonan mas radikal dje partido di ekstremo derechi aleman AfD na un multa di 13.000 euro pa motibu di a usa un slogan nazi durante di un reunion elektoral.
Höcke a keda prosesá pa motibu di a pronunsiá e slogan nashonal sosialista “Alles fur
Deutschland” (“Tur kos pa Alemania”) den un reunion den 2021 i pa kua fiskal a demandá un kastigu kondishonal di seis luna di prizòn.
“Alles fur Deutschland” tabata un lema usá pa SA, e formashon paramilitar dje partido nazi ku a desempeñá un papel klave den e yegamentu na poder di Adolf Hitler.
Na Alemania ta algu ilegal pa usa e slogan ei, meskos ku realisá e saludo nazi òf ekshibí otro símbolonan dje ideologia.
Höcke (52), un profesor retirá di historia i dirigente di AfD den e region di Turingia, a bisa di no tabata na altura ku e frase tabata un lema nazi. Pero e fiskalnan a insistí ku el a usa e palabranan ei ku pleno konosementu di “nan orígen i nan nifikashon”.
E partido ultraderechista aleman a haña su mes afektá ku vários skandal ku ta afektando nan popularidat riba kaminda pa elekshonnan europeo di 9 di yüni.
Luna pasá, hustisia a anunsiá di a start un investigashon pa sospecho di finansiamentu ruso i chines na fabor dje eurodiputado Maximilian Krah, kabesante di lista di AfD den elekshonnan europeo.
Ademas un di su asistentenan den Parlamento Europeo a keda detené, akusá di ta un agente chines.
