MINNEAPOLIS, MERKA.- Multitut grandi a protestá djasabra rònt Merka kontra presidente Donald Trump. Miónes di persona ta indigná pa su estilo outoritario di goberná, su polítika stringente di migrante i e guera kontra Iran.
E organisadónan di e manifestashonnan a afirmá ku “por lo ménos 8 mion persona a reuní den mas di 50 estado”, desde siudatnan grandi te na pueblonan chikitu. Outoridatnan merikano no a duna un kalkulashon nashonal di e kantidat di partisipante na e protesta.
Esaki ta di tres biaha den ménos ku un aña ku merikanonan ta sali riba kaya pa protestá. Esaki ta parti di e moveshon “No Kings”, e grupo di oposishon di Trump di mas visibel, desde ku su segundo mandato a kuminsá den yanüari 2025.
Na New York, e siudat di mas poblá di Merka, míles di manifestante a reuní, inkluyendo e aktor ganadó di Oscar Robert De Niro, un krítiko frekuente di Trump.
De Niro a bisa ku e presidente ta “un menasa eksistensial pa nos libertat i nos seguridat”.
E protestanan a ekstendé di kosta pa kosta, desde Atlanta te na San Diego. Habitantenan di estado di Alaska tambe a uni e manifestashon.
“Niun pais por goberná sin konsentimentu di e pueblo”, asina Marc McCaughey a deklará na AFP, un veterano militar di 36 aña.
Trump tabata na Florida durante fin di siman.
E klima anti-Trump a pasa fronteranan di Merka, ku manifestashonnan den siudatnan europeo manera Amsterdam, Madrid i Roma, kaminda 20.000 persona a marcha ku presensia fuerte di polis.
Den e promé manifestashon “No Kings”, yüni aña pasá, vários miónes a sali den kayanan desde New York te San Francisco, miéntras ku e segundo edishon di e protesta, den òktober, e reuní ku shete persona segun e organisadónan.
“Desde último biaha ku nos a marcha, e atministrashon akí a hinka nos mas profundo den e guera”, segun indikashon di un miembro di Common Defense, un asosiashon di veteranonan ku ta forma parti di e movementu “No Kings”.
