Betrian:
WILLEMSTAD.- Ora Kòrsou logra klasifiká pa un Kampeonato Mundial di FIFA, por konsiderá esei sin duda komo e logro deportivo di mas grandi den nos historia. Pero, no mester laga nifikashon di un logro asina keda riba e kancha di futbòl so. E mester hañá un lugá den nos ambishonnan relashoná ku desaroyonan general di futuro di Kòrsou komo komunidat, di akuerdo ku eks gezaghebber i èks promé minister, Stanley Betrian.
“Hopi bia, nos debate públiko ta dominá pa problema. Nos ta papia di reto ekonómiko, desigualdat sosial, kuestionnan di gobernashon i divishon polítiko. Naturalmente, esakinan ta tópikonan real ku ta meresé atenshon, pero no por konstruí un komunidat solamente rondó di problema. E mester di soñonan komun tambe”, Betrian ta bisa.
E ta di opinion ku partisipashon na e Kampeonato Mundial ta ofresé Kòrsou presisamente un soño asina. “Futbòl tin un karakterístika spesial. E ta trese hendenan huntu ku, fuera di dje, kisas no ta di akuerdo ku otro riba kasi nada. Durante un partido internashonal, preferensianan polítiko, diferensianan sosial i interesnan personal ta pasa pa un momentu pa segundo plano. E ora ei ta konta solamente un identidat: esun di Kòrsou.”
Esaki, segun Betrian, ta hasi futbòl hopi mas ku un deporte. “E ta hasi futbòl un instrumento di union nashonal. Presisamente p’esei, no mester mira e ambishon pa yega riba e podio mundial di futbòl solamente komo responsabilidat di Federashon Futbòl Kòrsou (FFK). E ta meresé un lugá mas amplio den nos desaroyo nashonal.”
Un logro pa un Kampeonato Mundial, Betrian ta bisa, lo no trese solamente benefisiosonan deportivo. “E lo duna Kòrsou visibilidat mundial, habri oportunidatnan turístiko nobo i por duna un impulso fuerte na nos reputashon internashonal. Mas importante ainda ta e mensahe ku esei ta manda na nos hóbennan.”
Naturalmente, e resultado di djadumingu kontra Alemania ta doloroso. Un derota di 7-1 ta un rekordatorio ku ainda tin hopi trabou pa hasi. Pero, lo ta un fayo permití ku e resultado di un solo partido ta kibra e nifikashon di loke ke logra, esta Betrian.
Un isla chikí ku logra midi su mes ku e paisnan di futbòl di mas grandi na mundu, ta proba ku éksito no ta determiná pa grandura, sino pa vishon, disipliná, organisashon i perseveransia. Esaki ta, kisas, un di e lèsnan di mas importante ku nos por transmití na un generashon nobo. Pero soña solamente no ta sufisiente, di akuerdo ku Betrian.
“Si Kòrsou realmente tin e ambishon pa establesé su mes di manera duradero riba e nivel internashonal di mas haltu, anto tin mester di un strategia kla di largu plaso. P’esei e momentu a yega pa desaroyá un Vishon Nashonal di Futbòl 2026–2040. Un vishon asina no mester pone atenshon solamente riba e selekshon nashonal, sino tambe riba desaroyo hubenil, infrastruktura deportivo, formashon di entrenadónan, futbòl femenino, siensia deportivo i partisipashon di nos diáspora. Ademas, e vishon aki no mester keda limitá na federashon di futbòl so.”
