Un foto di archivo dje kabesante nobo di Iglesia Katóliko den su añanan na Perú.
PARIS, Fransia (AFP).- For di rònt mundu reakshonnan di felisitashon a surgi riba instalashon di Leon XIV di 69 aña komo e kabesante nobo di Iglesia Katóliko.
Merka:
Presidente Donald Trump a felisitá Leon XIV den un mensahe riba su ret Truth Social. “Ki emoshon, i ki gran honor pa nos pais. “Ta mi deseo pa sera konosí ku Leon XIV. Lo ta un gran momentu”, segun el a skirbi.
Perú:
Presidente di Perú, Dina Boluarte, a destaká e echo ku papa Leon XIV ta un peruano pa “elekshon i konvikshon”, ku mas di 20 aña di servisio den e pais. Ta un “momentu históriko pa Perú”, segun e mandatario a skirbi riba Facebook.
Robert Francis Prevost a nase na Chicago, Merka, pero a nashonalisá peruano den 2015.
Argentina:
“Awe mas ku nunka, nos ta anhelá pa e bos di papa zona ku forsa den defensa di e pilarnan ku ta sostené sivilisashon: bida, komo esun prinsipal; libertat, komo don sagrado di Kreador; i e propiedat privá, komo fundamentu di responsabilidat i desaroyo di e pueblonan”,segun presidente Javier Milei.
Colombia:
Presidente Gustavo Petro a selebrá e elekshon di un papa norteamerikano ku profundo vínkulo ku Amérika Latina. “Nos ta spera ku lo e ta e gran lider di pueblonan migrante na mundu i ku lo e duna aliento na nos rumannan migrante latinoamerikano, awe humiá na Merka”, segun e mandatario iskierdista.
Brasil:
Presidente Luiz Inácio Lula da Silva, a pidi e papa nobo pa sigui ku e labor di papa Francisco. “Mi ta deseá pa e duna kontinuidat na e legado di papa Francisco, ku tabatin komo birtutnan prinsipal pa buska pas i hustisia sosial, e defensa di medio ambiente, e diálogo ku tur pueblo i tur religion, i rèspèt pa e diversidat di sernan humano”.
México:
Presidente Claudia Sheinbaum a destaká e “konvergensia humanista” ku e pontífise nobo. “Nos ta felisitá su Santidat Leon XIV. Nos ta ratifiká nos pensamentu humanista na fabor di pas i prosperidat di mundu”, segun e mandatario iskierdista.
Italia:
E promé diskurso di Leon IXV tabata “un yamada poderoso pa pas, pa fraternidat i responsabilidat”, segun promé reakshon dje mandatario italiano Giorgia Meloni. “Italia ta mira ku rèspèt i i speransa” na su “herensia spiritual,ku ta forma parti dje kaminda ku papa Francisco a kana”.
Spaña: E presidente sosialista Pedro Sanchez a bisa di ta spera ku e papa nobo lo “kontribuí na fortalesé e diálogo i defensa di derechinan humano”.
E rei di Spaña, di su parti, a señalá ku su yamada pa pas, lo inspirá i duna aliento.
Fransia:
Presidente Emmanuel Macron a boga pa e “pontífise nobo ta portadó di pas i speransa. El a manda un”mensahe fraternal” pa e papa nobo i pa “tur katóliko di Fransia i di mundu”.
Ukrania:
Presidente Volodimir Zelenski a bisa di ta spera ku Vatikano lo sigui apoyá Kiev “moralmente i spiritualmente” pa ”restablesé hustisia i logra un pas duradero ku Mòsku.
Rusia: E presidente ruso, Vladimir Putin, a bisa di ta spera ku e pontífise lo sigui e “diálogo konstruktivo”ku Kremlin. “Ku e tin konfiansa ku e diálogo konstruktivo i e koperashon establesé entre Rusia i Vatikano lo sigui desaroyá su mes riba e base di balornan kristian ku ta uni nos”.
Alemania:
“Pa su funshon, e ta duna speransa i orientashon na miónes di kreyente rònt mundu den tempunan difísil”, segun e hefe di gobièrnu aleman, e konservador Friedrich Merz.
Polonia:
Presidente Andrzey Duda a sigurá ku su pais, tradishonalmente katóliko, ta dispuesto na “estrechá lasonan úniko” ku iglesia despues di elekshon di papa Leon XIV.
Union europeo:
Presidente di Komishon Europeo, Ursula van der Leyen a alabá e kompromiso pa pas di e papa nobo. “Nos ta deseá ku e ta guiá pa sabiduria i forsa, miéntras ku e ta guia e komunidat katóliko i inspirá mundu ku su kompromiso na fabor di pas i diálogo”.
Reino Uní: promé minister Keir Starmer a bisa ku”elekshon di papa Leon ta un momentu di legria profundo pa katólikonan di Reino Uní i di rònt mundu, i ta habri un kapítulo nobo pa liderazgo di Iglesia na mundu”.
Hungria: “Nos tin un papa. ”Nos tin speransa”, segun reakshon di promé minister húngaro Viktor Orban.
Libanon:
Presidente Joseph Aoun, úniko hefe di estado kristian di mundu árabe, a felisitá iglesia katóliko i mundu kompleto ku elekshon di Leon XIV.
Israel:
Presidente Isaac Herzog a bisa di ta spera un fortalesimentu di laso entre su pais i Santa Sede, komo tambe amistat entre hudiu kristiannan na Tera Santu i rònt mundu”.
Míles i míles di hende a reuní na Roma i tabata testigu di e promé presentashon públiko di Papa Leon XIV komo e kabesante nobo di Iglesia Katóliko.
