VATICANO, AFP.- Francisco, e promé papa latinoamerikano a fayesé ayera djaluna na su 88 aña di edat, despues di un dékada di pontífise hopi popular entre e fielnan, aunke el a enfrentá un oposishon feros denter di su propio iglesia katóliko.
E salú di e papa argentino, lider di iglesia katóliko for di 2013 tabata kologá na un hilu pa algun luna kaba. E tabata den hospital pa 38 dia debí na un ‘neumonia’ grave te ku dia 23 di mart último. Hopi debil, el a partisipá djadumingu pasá na e selebrashon di Pasku di resurekshon na Vatikano.
Segun pontífise den un anunsio publiká pa Santa Sede, Francisco a muri di un ataka ku a provoká problema di kurason ireversibel. El a muri 7.35 di mainta den su kas na Santa Marta kaminda e tabata biba.
Di Filipina te Merka i di Alemania te Suráfrika, pasando Iran, Rusia, Brasil, Líbano, Israel òf e outoridat Palestina, dirigentenan di mundu henter e duna homenage unánime na papa Francisco.
Den oranan di anochi miles di fiel, algun ku flor i bela a reuní den orario riba plasa di San Pedro na Vatikano. “Nos a pèrdè nos tata spiritual;”, asina Riccardo Vielma, un venezolano di 31 aña ku ta studiante pa saserdote a bisa.
Na Buenos Aires, siudat natal, Juan Jose Roy tabata yora. “Ta hopi duru pasobra e tabata un persona ku ta okupá su mes ku e pobernan i pasobra el a laga nos nos so. E lo ta semper huntu ku nos”, asina e hòmber di 66 aña a bisa na AFP.
