RAFAH, PALESTINA (AFP).- Israel durante dia di ayera a enfrentá un ola di kondena internashonal pa un bombardeo ku segun outoridatnan di Gaza, a mata 45 persona den un kampo di refugiadonan den Rafah, den zùit dje área palestino, goberná pa e movementu islamita Hamas.

Israel a deklará di ta investigando e “bombardeo  grave” den Gaza djadumingu anochi, ku a laga vários víktima sivil i ku, segun ehérsito, tabatin komo meta e milisianonan di Hamas.

Ehérsito israelí a señalá ku su avionnan a gòlpiá un instalashon di Hamas den Rafah”, den un atake ku nan a mata dos figura grandi dje grupo islamita.

Presidente di Fransia, Emmanuel Macron, a bisa ku “e operashonnan aki mester para. “No tin zonanan sigur den Rafah pa sivilnan palestino”.

E hefe di polítika eksterior di Union Europeo, Josep Borrell, a bisa di ta “hororisá pa e notisianan ku ta yega for di Rafah relashoná ku e atakenan israelí ku a mata un kantidat di inosente, inkluyendo muchanan”.

E bombardeo a tuma lugá algun ora despues ku Hamas a tira rakètnan kontra e siudat israelí di Tel Aviv i otro zonanan den sentro di Israel. E defensanan aéreo israelí a tumba mayoria dje rakètnan i no a registrá víktima.

E atake israelí riba Rafah, kaminda tin algun shen mil palestino ku a bai skonde pa e guera, a provoká un kandela grandi den e área.

“Nos a mira kurpanan karbonisá. Tambe amputashonnan, muchanan, hende muhé i ansianonan heridá, segun un testigu.

Segun un hòmber a duna di konosé “nos a kaba di hasi nos orashon di anochi, nos yunan tabata durmiendo na momento ku direpente nos a tene un zonido fuerte i a mira kandela tur kaminda. “E muchanan tabata grita, e zonido tabata fuerte”, segun un sobrebibiente.

Imágennan divulgá ta mustra esenanan kaótiko di personal médiko evakuando kantidat grandi di herido.

Krímennan di guera

Egipto a denunsiá “un atake kontra di sivilnan indefenso”, miéntras ku Jordania a akusá Israel di a kometé “krímen di guera”. Arabia Saudita a kondená e masakrenan kometé pa forsanan di okupashon israelí”.

Turkia a primintí di “lo hasi tur loke ta posibel pa e asesinonan por paga pa loke nan a hasi”.

Qatar, ku huntu ku Merka i Egipto ta media pa logra trese pas den e konflikto i liberá rehennan den Gaza, a atvertí ku e bombardeo por stroba e negosiashonnan.

E presidente di Union Afrikano, Mousa Faki Mahmat, a reklamá ku “Israel ta sigui violá e derechinan internashonal i despresiando un sentensia di Korte Internashonal di algun dia pasá ku a ordená pa pone fin na su akshon militar den Rafah”.

Ku e mortonan di djadumingu último, e total di palestinonan ku a pèrdè nan bida den e guera a yega 36.050, den gran mayoria hende muhé i mucha, segun e Ministerio di Salú di Gaza.

…Un manifestante ta karga un potrèt di Promé Minister israelí Benjamin Netanyahu, komparando esaki ku e lider Nazi Adolf Hitler, durante di un demostrashon na Fransia…

LAGA UN KOMENTARIO

Please enter your comment!
Please enter your name here