REHOBOTH BEACH, USA (AFP).- Joe Biden a renunsiá e karera pa su reelekshon presidensial den luna di novèmber próksimo, i ta respaldá e vise presidente Kamala Harris pa esaki bira e kandidato nobo di Partido Demokrat, despues di simannan di spekulashon riba e kapasidat físiko i abilidat mental dje mandatario.
E demokrat, di 81 aña, ku e desishon a pasa pa forma parti dje klup chikitu di presidentenan norteamerikano saliente ku ta tira sèrbètè den ring durante di un intento pa logra un di dos mandato. Pero e ta bira esun di promé ku a hasi esei na e altura aki di kampaña. E ta bira e úniko ku mester a hasi esei pa motibu di dudanan riba su forsa mental, despues di un debate hopi malu ku su rival republikano Donald Trump.
“Mi ta kere ku ta mihó pa mi partido i pa pais pa mi retirá mi kandidatura i konsentrá solamente pa kumpli ku mi obligashonnan komo presidente durante sobrá di mi mandato”, Biden a bisa den un karta riba ret sosial miéntras ku e ta rekuperá di Covid na su residensia na Delaware.
E anunsio, ounke sperá pa hopi hende, ta dal un buèlta nobo den un kampaña ku ya a eksperensiá vários situashon, entre nan un intento di asesinato riba Donald Trump dia 13 di yüli.
Ta e intenshon di Biden pa “e siman aki duna mas detaye na nashon” riba su desishon den un presentashon públiko.
E mandatario a anunsiá su “apoyo total” na Kamala Harris komo kandidata di su partido, e promé visepresidente muhé, afro amerikano i di orígen sur asiátiko den historia di Merka.
Harris a elogiá e “akto sin interes i patriótiko” di Biden i a duna di konosé di ta spera di “gana nominashon” di e partido.
“Lo mi hasi tur loke ta na mi alkanse pa uni Partido Demokrat i uni nos nashon pa derotá Donald Trump”, segun el a skirbi den un komunikado.
E kandidato republikano Donald Trump, di 78 aña, i su ekipo, a probechá pa kritiká tur Biden. “E korupto Joe Biden no tabata apto pa postulá su mes komo presidente, i sigur no ta den kondishon pa sirbi… i nunka e tabata esei”, segun Trump riba su ret Truth Social.
“Harris lo ta pió ku Biden pa hendenan di nos nashon”, segun su ekipo di kampaña a agregá.
E lider republikano di Kámara di Representantenan, Mike Johnson, a bai mas leu i a hasi un yamada riba Biden pa retirá “awor dirèkt”.
Entre e demokratnan ta multipliká elogionan na Biden, kende nan ta kalifiká komo “patriota”.
Awor Partido Demokrat mester buska un sustituto, na momento ku falta masha poko dia pa e konvenshon programá pa tuma lugá na Chicago kuminsando 19 di ougùstùs.
Harris ta parse un elekshon natural, pero no outomátiko. E último palabra ta keda disidí pa delegadonan dje partido: 3.900 persona ku pensamentu hopi variá i pa gran parti kompletamente deskonosí pa e opinion públiko.
Reakshon Barack Obama
E eks presidente di Merka, Barack Obama, a elogiá e desishon di Joe Biden pa no aspirá pa un di dos mandato, pero a atvertí ku e desishon a pone demokratnan riba “un tereno deskonosí”.
Biden tabatin “tur derechi” pa presentá su mes pa reelekshon, Obama a bisa den un komunikado, den kua el a elogiá e trayektoria dje mandatario di 81 aña ku el a kalifiká di “patriota”.
“Nos lo move riba un tereno deskonosí den próksimo dianan. Pero mi tin un konfiansa ekstraordinario ku e lidernan di nos partido ta kapas pa krea un proseso for di kua ta surgi un kandidato”.
Promé minister britániko
E promé minister britániko Keir Starmer a bisa di ta respetá e desishon di Joe Biden pa retirá su kandidatura na presidensia.
“Mi ta respetá e desishon di presidente Biden”, el a skirbi riba X, i “mi sa ku manera el a hasi durante di su karera notabel, el a tuma su desishon analisando kiko e ta haña ta mihó pa e pueblo norteamerikano”.
Kansier aleman
E kansier aleman Olaf Scholtz a bisa ku desishon di Joe Biden di retirá su kandidatura “ta meresé rèspèt”.
“Mi amigu Joe Biden a logra hopi” pa su pais, pa Europa, pa mundu”, Scholz a skirbi riba X. “Su desishon pa no presentá su mes ta meresé rèspèt”, el a agregá.
Presidente israelí
E presidente di Israel, Isaac Herzog, a gradisí Joe Biden pa su apoyo durante di dékadanan na e pueblo israelí. “Mi ke ekspresá mi mas sinsero gradisimentu na Joe Biden pa su amistat i firme apoyo na e pueblo israelí durante di su karera”, Herzog a skirbi riba retnan sosial.
Eks presidente Clinton
Eks presidente Bill Clinton i su kasá i eks sekretario di Estado Hillary Clinton a elogiá e desishon di Joe Biden, i ta apoyá Kamala Harris pa sustituí Biden.
Den un komunikado, e pareha a alabá e “ekstraordinario karera di servisio” di Biden i ta respaldá Harris komo kandidata demokrat. “Nos lo hasi tur loke nos por pa apoy’é”, nan a bisa.
“No tin nada ku ta preokupá nos mas tantu pa nos pais ku ta e menasa di un di dos mandato di Trump”. “For di e promé dia el a primintí di ta un diktador”, nan a agregá.
Kremlin
Na Rusia Kremlin a bisa di ta sigui e akontesimentunan na Merka, despues ku Joe Biden a bandoná e kampaña pa presidente, agregando ku “hopi kos por kambia”.
“Ainda falta kuater luna pa elekshon. Ta hopi tempu, durante kua hopi kos por pasa. Nos mester pone atenshon, sigui loke ta tuma lugá i atendé ku nos mes asuntunan”, segun e bosero di Kremlin, Dmitri Peskov.
