PARIS, AP.- E bishitantenan di un museo importante di arte kontemporáneo na Paris no a laga solamente nan bachi den lòbi, pero nan paña kompleto a keda atras.
Palais du Tokyo a habri su portanan pa nudistanan pa un bishita spesial djasabra. Esaki ta parti di un esfuerso kresiente di e komunidat nudista na Fransia pa promové aseptashon, despues di e apertura di un parke nudista i un restorant nudista den e pais.
E bishita na e museo a wòrdu organisá promé ku oranan di bishita regular pa e nudistanan no meskla nan mes ku otro bishitantenan.
E organisadónan a bisa ku nan ta spera di atraé miembronan hóben na e komunidat i eliminá “komplehonan” riba e práktikanan nudista, ku no mester wòrdu limitá na “laman, verano òf un kategoria di e pueblo”.
