JONATHAN MELENDEZ; asesiná huntu ku su famia.
CIUDAD DE MEXICO (AFP).- Un músiko mehikana, huntu ku su kasá kende ta na estado i nan yu muhé, a keda asesiná na Méhiko den un krímen pa kua a detené un sosio dje músiko i otro persona. E músiko ta Jonathan Melendez (38), kende ta toka ‘keyboard’ i ta kompositor i produktor musikal komo tambe fundadó dje banda di ‘synth pop’ Camilo Séptimo.
Polis a bin topa ku e restunan mortal djamars mardugá den kas dje músiko, ubiká den un bario residensial dje kapital mehikano. Sekretario di Seguridat dje pais a indiká ku e hòmber, popularmente konosí komo Honas, tabatin su mannan mará i ku un tiru den kabes. E meskos a sosodé ku su kasá, di 35 aña, ku tin kuater luna na estado i nan yu muhé di tres aña. Un di kuater víktima, un dama di 21 aña, a muri ku un tiru den lomba. Kachó dje famia tambe a keda tirá. Un mucha hòmber di 6 aña, no identifiká, a keda hañá na bida i sin señalnan di violensia.
Polis a duna di konosé ku investigashon ta mustra den direkshon di “probabel partisipashon” di dos hòmber ku “a probechá dje relashon di konfiansa di un di nan ku e víktimanan pa nan por a drenta den e kas”. Un fuente ofisial a deklará na AFP ku “posibel kousa dje homisidio ta robo”.
Camilo Séptimo a keda formá den 2013. Nan tin kuater álbum publiká i a risibí e nominashon pa Premionan MTV den 2022. E grupo ta konta ku un promedio di 1.4 mion oyente mensual riba e plataforma Spotify.
