WASHINGTON (AFP).- E multi mionario Elon Musk a bisa ku su maneho pa korto den gastunan di e gobièrnu di Trump lo generá un sparmentu di 150.000 mion dollar, hopi mas abou ku su kálkulonan anterior di dos bion.
Musk, e hòmber mas riku di mundu, den yanüari a risibí e mishon di presidente Donald Trump pa kòrta drástikamente den e gastu federal di Merka via di e resien kreá Departamento di Efisiensia Gubernamental (DOGE).
“Mi ke anunsiá ku nos ta antisipá ku ta spar 150.000 mion dollar den aña fiskal 2026 danki na e redukshon di desperdisio i froude”, segun Musk a reportá na Trump durante di un reunion di gabinete den White House.
Musk, doño di kompanianan manera Tesla i SpaceX, a sigurá ku e kòrtamentu den gastu “lo tradusí den mihó servisio pa e pueblo norteamerikano”.
Musk, kende su funshon den White House ta finalisá otro luna, ta blanko di krítikanan pa motibu ku e gobièrnu di Merka a otorgá kontraktnan importante na su empresanan. Tambe DOGE a generá alarma pa motibu ku e tin akseso na datonan konfidensial via di Departamento di Finansa dje pais.
