NEW YORK, AP.- E asesino tabata hispániko. Asina polis a indiká. Su dos víktimanan tabata musulmannan di Bangladesh, un di nan ta iman. Nan a wòrdu tirá sin provokashon miéntras nan tabata kana di su meskita pa kas. Un siman despues di e asesinato di e dos hòmbernan, fiskal no por a presentá un hipótesis dikon e sospechoso, Oscar Morel di 35 aña di edat a skohe e víktimanan aki.
E asesinatonan di e iman Maulana Alauddin Akonjee i su amigu Thara Uddin a wòrdu ataká den pleno lus di dia siman pasa despues ku nan a Sali un moské. Riba videonan di seguridat por a mira Morel na momentu ku e ta hui di e zona den un trùk GMC Trailblazer algu despues ku e dos víktimanan a risibí un tiru den kabes. 10 minüt despues, un vehíkulo ku ta kuadra ku deskripshon di e sospechoso a dal un siklista na 4,8 kilometer di distansia na Brooklyn.
E hòmber a wòrdu detené djaluna pafó di su kas na Brooklyn, algun integrante di e komunidat di Bangladesh di Queens i Brooklyn a bisa ku den último lunanan nan tabata víktima di personanan ku tabata grita frasenan antimusulman.
