Myrena; arte ta mi bida

 

Sra. Myrena Sint Jago tabata na Kòrsou kaminda el a keda gradesí pa su trabounan pa komunidat ku e kondekorashon real ku el a risibí for di man di gobernadó interino na nòmber di su mahestat rei Willem Alexander. Myrena su trabounan partikular na bienestar di komunidat a hasié meritorio pa e premio aki.  Práktikamente tur aña sra. Myrena ta bin Kòrsou pa e dediká na produkshon di Teatro, manera baile, poesia I aktuashon pa hóben i adulto. Myrena ta un embahador pa Kòrsou den eksterior i su obranan hopi bia ta dirigí ku e pensamentu di su dushi Kòrsou. Myrena Sint Jago tin un variedat di eksperensia riba tereno di baile ( balèt, baile moderno, jazz, jazz-moderno, Afro-Karibense  etc.). El a  studia na Hulanda, Inglatera, Merka  i Cuba. El a risibí diferente beka i rekonosimentu pa studia na diferente instituto di baile, tambe na Alvin Alley American Dance Theater na New York. Myrena ta un E-RYT 500 (Experienced Registered Yoga Teacher through Yoga Alliance; e 500 ta nifiká ku e oranan ku ta rekerí i tin mas ku 10 maestro sertifiká na Integral Yoga Institute in NYC; Kripalu Center for Yoga and Health i Yogaville i ta duna lès for di 1996 na diferente kaminda.

Su soño a bira realidat…

 

I tabata un honor pa nos a papia ku Myrena Sint Jago kende a konta nos di su trayektoria i yega te kaminda e ta awe ku ta direktor artístiko di Liberata Dance Theatre  ( LDT)na New York. Despues di a kaba MIL, Myrena a haña un beka i a bai Hulanda pa studia kaminda el a bai un akademia di baila i a presentá na diferente shou. Tabata shownan na Hulanda mes i ku a pasa tambe na televishon. El a haña un diploma pa Pedagogo di Baile na Scapino Akademia di Baile na Amsterdam, un  “Bachelor of Arts na Empire State College i un Maestria den Trabou Sosial na Fordham University na New York.  Myrena  a konta nos ku el a studia diferente estilo di baile i a presentá pa diferente teatro i den konsiertonan i tabata parti di diferente kompanianan di baile, di kual un par di nan ta por ehèmpel di Bill T. Jones, Fred Benjamin’s; Joan Miller; Frank Ashley, Roots of Brazil, Viva Brazil Dance Companies.

Myrena su deseo semper tabata pa bai New York ku ta e sentro di arte. E tempu ei ta tres hende so tabata haña beka pa bai studia den e kaso aki na Merka. Na 77 el a haña un beka pa sigui studia na New York i asina su soño a bira realidat.

Un fushon di baile…

Di tur e bailenan ku el a siña, Myrena a bisa ku su idea tabata ora el a bai Merka pa hasi baile moderno i jazz pero el a studia tambe klásiko ku ta e sentro ku a dun’é e fundeshi pa asina e yega na su mes estilo. El a sigui studio tambe klásiko (te ainda e ta tuma lèsnan na banda pa duna, pa e older getting bones keda den kondishon, ” the aching, aging bones”. Pero tambe e ta gusta afro karibense.Ta poko difísil pa Myrena bisa kua presis e gusta mas. Ta dependé kiko e muzik ta bis’é, kiko e historia i e proyekto ta bis’é e ta meskla e estilonan den otro. Ta un fushon di baile, ta manera e ta sintié asina e ta traha e baile.

 

Entre New York i Kòrsou…

 

El a duna lès di baile na Merka i a balia internashonal ku diferente kompanianan di baile, koreógrafonan i diferente gruponan di teatro.Tambe el a duna lès pa 16 aña na “Integral Yoga Institute” na New York i diferente otro instituto di yoga. For di momentu ku el a establesé na New York,e tabata bin Kòrsou tin bia asta 2 bia pa aña. Myrena ta haña ku el a haña e chèns pa studia un kaminda i e tin di duna bèk. I p’esei ora e ta bin Kòrsou e ta duna bèk. E ta traha ku hende di diferente edat tantu na Kòrsou komo na New York e ta duna lès na mucha i hende grandi. Tur aña tin un proyekto ta sali. Su kompania ku yama Liberata Dance Teatre. Liberata ta e di dos nòmber di su mama. Su mama a nase 17 di ougùstùs i fayesé 2 di òktober. Ta fecha nan memorabel Myrena a bisa; 17 di ougùstùs ta lucha pa libertat i 2 di òktober a mata Tula. El a skohe e nòmber pasobra e ta manera un libertat, un libertat pa e mes. E mes a hasi un investigashon pa sa ken e ta. I asina e ta traha su obranan. E ta hasi historia di nos hendenan di aki banda, (reclaiming history) djis pa sa ken nos ta. I e di dos parti di su kompania su meta ta pa reinvigorating life. I e ta traha un baile por ehèmpel di mama tera, di naturalesa.

“Mi Tei”…

 

Tambe Myrena ta traha obra riba loke ta pasando na e momentu ei. Loke ta pasando e ta haña inspirashon pa e traha ariba.  Un obra kaminda e por konta kiko nos tur ta pasando aden. I esei ta netamente loke el a krea na Kòrsou durante di su bishita. El a krea un obra ku ta mustra riba e situashon di Pandemia di COVID.  E título ta Mi Tei. E ta kòrda kon e ta sinta den su apartamentu na New York i e ta mira hendenan riba stelage ta limpia bentana, nan ta Hanging in There. I ora tradusié na papiamentu ta Mi Tei. Bo ta puntra un hende kon ta ku e situashon nan ta bisa bu Mi Tei.

” I e obra ta bai over kon nos a dil i manehá e situashon di Aña 2020. E obra ta “tuma lugá na Hato i dor di retraso di KL 0202 pa destino Amsterdam pa 2 ora di 20 minüt dor di problema ku kòmpiuter, nos lo sali 20 pasá di 20 (pues 20 pasa di 8 anochi).

Siman pasá na Pietermaai Art Space a tuma lugá e obra Mi Tei. Ta trata aki di un obra Work in Progress ku lo finalisá na novèmber próksimo. Ta un obra skibi pa Myrena Sint Jago, dirigí pa Myrena i Laura Qaust. Partisipantenan Lila Leito, Ingrid vd Hilst, Georgette Peterson, Claudette Dekker, Soñia Gout i Divaney Boeldak. Riba kitara tabatin Stanley van Blarcum miéntras ku zonido tabata den man di Calvin Eleonora. Tabata un obra ku a mustra kon sifranan tabata subi i a trese konfushon en konekshon ku pandemia COVID-19 i e aerolínea Delta. Alabes a duna homenahe kòrtiku na gran kantante Ced Ride (qepd). E obra tabata algu serio i prèt alabes, e tabatin baile, kantamentu (wak nos video).

Pa chikí i grandi…

 

For di aña nan 1972, den Mireya su promé fakansi despues di a bai Hulanda na 1970 e ta bin Kòrsou, i ta hasiendo e trabounan ku e ta hasi te ainda. El a duna lès di baile tur kaminda, entre otro Huize Pelletier, St. Jozef, Habaai, St. Ricardus te huis, Sanatorium. Tur kaminda Myrena tabata hasi e trabou aki di forma boluntario. I den Marie Pampoen, for di unda Myrena mes ta bin e ta usa kaminda e por haña manera sentro di bario òf asta bou di e palapanan pa e duna lès.

E tin un skol chikitu (ainda) ku yama “Skol Di Liberata”, kaminda e tin 3 instruktor ta duna lès p’e ora e no ta na Kòrsou. Nan ta usa e espasio di PAS ( Pietermaai Art Space). Myrena su soño ta pa tin su mes studio ku bon flur I fasilidatnan pa ora e bini Kòrsou e por usa pa duna su lèsnan di tantu baile, yoga, tayernan i tambe tayernan relashoná ku salu etc., etc.

Pa Myrena tur hende meresé un oportunidat i p’esei e ta traha ku tur generashon, grandi chikí i tur.

Papiando di su sentimentu pa baile, el a bisa nos ku arte ta bida.  Baile i tur forma di baile ta bida. E ta sinti manera e pas ta pone sinti, e muzik ta pone sinti ora e ta baila, ora e ta den presentashonnan e ta sintié. Baile tin di bai for di bo kabes te bo tenchi pia bo tin di sintié. Bo tin di sintié den bo kurason, den bo sanger i bo benanan.

 

Mi hendenan ta mi korona…

Pa loke ta e kondekorashon real Myrena a bisa ku pe su amistatnan ta su korona, nunka el a hasi algu pa un premio. Nunka el a pensa ku e tin di hasié pa haña un premio. Su amistatnan si tabata pensa otro i semper nan tabata ke pa el a haña un premio. Myrena a sintié onra pa a haña e kondekorashon real ounke su hendenan ta su kondekorashon. “Mi ta onra pero bosnan tur ta mi lintjes”, asina Myrena a bisa ku un sonrisa”. E tin mas di  40 aña ta biahando entre New York i Kòrsou i esei ta e satisfakshon mas grandi pe, e akohida ku e ta haña serka su hendenan na Kòrsou.

 

Sigui konektá…

 

Myrena ke sigui konektá su grupo di NYC ku esun di Kòrsou pa no sigui duna lès i hasi presentashonnan via ZOOM, pero pa topa, kolaborá, kompartí, traha riba proyektonan i presentá. El a trese un show basta grandi Kòrsou i presente na  Centro Pro Arte i a trese un ‘dancer’ tambe un otro bia pa presentá na Kòrsou. Sinembargo e ke bai hasi mas regular pa trese bailadónan, instruktornan, direktornan I tambe un par di nos di Kòrsou pa bai NYC. Myrena a bisa ku nan a hasi 4 ‘Colaborations, Desèmber 2020, ” Sharing Light Among Friends” ; Holiday Celebration, ku hendenan, un par di su grupo, i otronan di Hulanda, Kenya, Gambia i US, a partisipá i kompartí nan talento. Tambe den Febrüari 2021, ” Black History Month Celebration; March 2021, “Women’s History Month” i aprel 2021 “Earth Day Celebrations”. Tur tabata presentashonnan Zoom i tur a bai masha bon mes. Hendenan a kanta, kompartí nan trabou di arte òf otro baile kreativo, toka instrumèntnan, lesa poema, i tin a presentá asta pa medio di lesa i baile.

Myrena ta spera di por yuda trein algun hóben pa nan logra riba tereno di baile i presentashon. E ta bisa ku trabou duru por logra sigur.

 

Spera mas…

 

Pa luna di novèmber próksimo Myrena lo ta bek pa hasi e produkshon aki un tiki mas largu. Mi Tei presentá siman pasa tabata djis un Work in Progress, e tabata manera un training chikí kaminda a invitá algun famia i amigu. Pero lo hasi e shou mas grandi den luna di novèmber próksimo.

Myrena Sint Jago ta alkansabel  via [email protected] or (917) 324-9369 (WhatsApp); wèpsait www.liberataonline.org

LAGA UN KOMENTARIO

Please enter your comment!
Please enter your name here