WILLEMSTAD – Servisio Meteorológiko di Kòrsou a emití un informashon general tokante yobida den luna di novèmber 2021 aki na Kòrsou. Na aeropuerto Hato a midi un total di 77mm di áwaseru. Esaki ta 45% ménos kompará ku e promedio di 30 aña (1990-2020) pa novèmber ku ta den kareda di 141mm. E dia ku mas áwaseru a kai na Hato tabata dia 25 di novèmber, 17.7mm. E kantidat di dianan ku áwaseru a kai den luna di novèmber tabata 10 i esei si ta kuadra ku e promedio di último 30 aña ku ta 11 dia.

E promedio di áwaseru na e otro stashonnan riba nos isla tabata alrededor di 50mm. E stashon ku a midi mas áwaseru tabata Stashon Onverwacht ku 82mm. E dia ku mas áwaseru a kai tabata 26 di novèmber na Soto unda a midi 23mm. A midi mas áwaseru na e stashonnan di Bándabou i sentral di Kòrsou. Athunto riba e gráfiko por mira e totalnan pa kada stashon na Kòrsou.

 

 

 

 

Tur modelo di klima ta indiká ku chèns ta hopi grandi ku pa próksimo luna nan mas áwaseru lo kai ku e promedio. Esaki tin di aber ku e periodo di La Niña ku tin influensia riba áwaseru na Kòrsou tambe.

 

LAGA UN KOMENTARIO

Please enter your comment!
Please enter your name here