PHILLIPSBURG.- Ayera den oranan di mainta na St. Maarten, polis a tira un atrakadó mata i heridá un sospechoso ku tabata kuné.
E dos atrakadónan a keda sospecha di a kaba di atraká un negoshi di joyería den Front Street den kareda di 11:00’or di mainta. Bou di menasa ku arma di kandela e atrakadónan a logra di bai ku un botin.
E atrakadónan a subi un skuter ku tabata warda nan den bisindario i a kore bai for di e sitio.
Polis tabata sospechá ku un òf mas sospechoso lo tabata envolví den e kaso di atrako.
Djis despues polis a mira e sospechonan riba skuter riba velosidat haltu riba Sucker Garden, i a drenta Arch Road.
Polisnan a bai para na lugánan stratégiko p’asina por logra detené e sospechosonan.
E skuter un dado momentu a bai dal kontra dje outo polisial ku tabata blòkia e kaya pa warda. Tantu e pasahero komo e okupante dje skuter a kai abou.
Agentenan polisial na e sitio a lòs disparo nan riba e atrakadónan, i bala a alkansá nan tur dos. Un di e atrakadónan a keda heridá mortalmente. Pero no ta konosí ku ta dor dje bala el a fayesé òf ta dor di e aksidente, i e otro okupante a keda gravemente heridá i a keda transportá pa hospital di St. Maarten.
Polisnan na e sitio mester a piki un kantidat konsiderabel di prenda ku a keda bentá riba kaya. A konfiská dos arma di kandela ku e atrakadónan tabatin huntu ku nan.

(Foto 721 News)

LAGA UN KOMENTARIO

Please enter your comment!
Please enter your name here