Órganonan respetá di e pais aki a bisa ku mester adapt’é
WILLEMSTAD.-Un bia mas screening di kandidatonan pa minister ta motibu di hopi diskushon den komunidat. Despues ku pueblo a bai urna 19 di mart último a start formashon di un gobièrnu nobo. Ayera a bira konosí ku Eduard Braam(MFK) a hala atras i no ta sigui den e proseso pa bira minister. Meskos ta asina ku e kandidatura di Ramon Chong (PNP) tambe ta na diskushon debí na desaroyonan den pasado.
Na algun okashon Susanne Camelia-Römer a duna su pensamentu komo hurista i tambe komo polítiko riba lei di screening. Mirando e kasonan spesífiko ku ta tumando lugá awor aki EXTRA a puntra e lider di PIN su pensamentu, mustrando ku ta hustamente e diskushonnan largu aki ta pone hende pensa ku ta danki dios tin un lei di screening bèrdat. Na opinion di Camelia-Römer, e diskushon no ta si mester tin un lei di screening si òf no pasobra ya kaba hopi hende a tuma nota ku na Ulanda tin un areglo ku ta reglanan e parti di integridat hopi bon. Algu otro for di e parti di integridat ta e parti étiko polítiko.
Partido PIN a saka un nota for di 2019 den kua a hasi un kompilashon di rapòrtnan di órganonan serio i respetá den e sosiedat aki. Ministerio Publiko (OM), Raad voor de Rechtshandhaving, Raad van Advies, Korte i tambe gobièrnu a manda un rapòrt pa Parlamento den kua ta mustra ku e lei di integridat(screening) tin hopi kos aden ku no ta bon. PIN ta proponé pa adaptá e lei pasobra ya kaba hopi víktima a kai. ‘Nos por ke un lei di screening, pero e mester ta bon si. No por keda sin koregí e lei aktual. PIN ta di akuerdo ku un lei di screening, pero ban sinta pa diskutí riba dje i korigié.
Hopi ta wak den direkshon di Ulanda ku no tin un lei di screening, pero einan tin un areglo. Na opinion di e lider di PIN e areglo aki ta hasi e trabou. Un idea ta pa kue e areglo ku Ulanda ta hasi uso di dje pa transformá esaki den un lei na Kòrsou. No lubidá ku konstitushon mes tambe ta brinda e forma pa atendé ku kandidatonan pa minister.
Tantu diskushon i víktima ku a kai debí na e lei aki mester ta sufisiente motibu pa para ketu i diskutí na un manera sano riba e lei aki, asina e lider di PIN a duna di konosé.
