CULIACAN, MEXICO.- Dieskuater persona a keda asesiná djadumingu den e estado mehikano di Sinaloa durante di un konflikto entre dos grupo poderoso di narkotrafikantenan, segun datonan ofisial.
E reporte, basá riba sifranan di ministerio públiko i dependensianan federal di seguridat, no ta bisa presis si e víktimanan tabata dirèkt envolví den e pleitu interno dje kartel di Sinaloa, un dje prinsipal gruponan kriminal dje pais.
E kantidat di asesinato ta esun di mas haltu entre e 32 estadonan mehikano riba djadumingu 15 di sèptèmber, dia riba kua 87 persona a keda asesiná rònt e pais miéntras ku tabata selebrá Dia di Independensia.
For di 9 di sèptèmber, e guera interno dje kartel a provoká vários enfrentamentu armá, blòkiamentu di kaminda i un situashon generalisá ku a afektá mas di un mion di habitante di Sinaloa, kuna di mafia ku ta disputá kontròl dje teritorio.
Segun datonan di Ministerio Públiko, e kantidat di asesinato a yega 39, inkluso e morto ayera di dos sivil i un militar. Tambe ayera a reportá e kaso di sekuestro di un hóben di 20 aña, ku kua e kantidat di personanan privá di nan libertat a oumentá na 34 meimei dje konflikto entre sikarionan.
Pa motibu dje konfliktonan, den wikènt último a kanselá e selebrashonnan di independensia, tambe skolnan a sera i ekonomia ta tambaliá.
Segun e gobernador di Sinaloa Ruben Rocha Moya, e violensia a surgi despues di detenshon dia 25 di yüli na Merka dje kapo Ismael Zambada Garcia, konosí komo “El Mayo”.
