Potrèt di migrashon kolombiano ta mustra Angel Aguilar, alias “Lobo Menor”, lider dje grupo kriminal ekuatoriano “Los Lobos”.
BOGOTA, Colombia (AFP).- Outoridat migratorio di Colombia a informá di detenshon dje narkotrafikante ekuatoriano, Angel Aguilas, vinkulá ku e asesinato na Quito dje kandidato presidensial Fernando Villavicencio un siman promé ku e elekshonnan di 2023.
Villavicencio, e tempu ei un dje kandidatonan presidensial mas popular, a keda tirá pa un sikario kolombiano ora ku el a sali un reunion den e kapital ekuatoriano. Tabata un suseso ku a marka un punto di kiebro den e violensia sin presedente ku a sakudí e pais.
Aguillar djárason a yega Méhiko ku un buelo for di Colombia i outoridatnan dje pais a mand’é bèk pasobra e tabatin un pasport kolombiano falsu. A deten’é ora ku el a yega Bogotá i a komprobá ku ta trata di dokumento falsu. E detenshon tabata relashoná ku un órden internashonal di kaptura di parti di Interpol.
Konosí komo “Lobo Menor”, e narkotrafikante ta miembro di Los Lobos, e organisashon narkotrafikante mas grandi di Ecuador, i e ta keda investigá pa “aparente partisipashon komo outor intelektual” dje asesinato di Villavicencio, segun outoridatnan a informá de un komunikado.
Presidente kolombiano, Gustavo Petro, a kalifiká Aguilar komo “un dje asesinonan mas grandi di mundu”.
