Artemis II Space Launch System (SLS), na Kennedy Space Center, Florida, práktikamente kla pa su lansamentu dia 1e di aprel benidero.
CABO CAÑAVERAL, USA (AFP).- Ayera NASA a anunsiá di ta konsiderando pa dia 1e di aprel lo lansa su mishon Artemis 2, durante kua astronoutanan lo bula rònt di luna pa promé biaha den mas ku 50 aña. E mishon a keda posponé diferente biaha pa motibu di problemanan tékniko.
E nave, e tripulashon i e ingenieronan di NASA awor ta kla, segun Lori Glaze, funshonario haltu dje agensia espasial norteamerikano. ”Nos ta riba kaminda pa un lansamentu dia 1e di aprel”, segun Glaze den un konferensia di prensa durante kua el a atvertí ku “ainda tin mas trabou pa hasi promé ku e lansamentu”.
Artemis 2 lo ta e promé buèlta ku tripulashon rondó di luna for di despues di finalisashon dje programa norteamerikano den 1972, ku a hiba e promé i úniko sernan humano riba superfisie di luna. Tres norteamerikano i un kanades lo forma parti dje tripulashon.
Durante dje buelo di prueba, e tripulashon lo hasi sierto trabou tékniko komo preparashon pa e siguiente mishon, Artemis 3, ku lo marka e regreso di norteamerikanonan riba superfisie di luna, ku e meta pa establesé un presensia duradero.
Artemis 2 lo forma parti dje kompetensia espasial entre Merka i China, dos potensia ku ta aspirá pa manda humanonan riba luna i establesé un base einan den e próksimo añanan.
