MUNICH, AP.- E sekretario general di Nashon Uni Antonio Gutteres a urgi nashonnan rònt mundu djabièrnè pa “no pèrdè e oportunidat di un resolushon di pas” riba e programa nuklear di Norkorea i a agregá ku un solushon militar lo tin “konsekuensianan katastrófiko”.
Guterres a bisa den e Konferensia di Seguridat na Munich ku mundu ta enfrentá e menasa di un konflikto nuklear pa promé biaha desde ku e Guera Friu a terminá debí na eventonan relashoná ku ambishonnan nuklear di Norkorea. El a pone énfasis ku mester di preshonnan global pa un solushon diplomátiko.
El a agregá ku ta nesesario pa sigurá ku Merka i Norkorea ta “uni i tene un diskushon signifikativo”.
“Mi ta kere ku Merka ta kla pa hasi esaki”, asina el a agregá. “Ta apsolutamente nesesario pa mantené preshon riba Norkorea i konvensé e pais ku ta apsolutamente vital pa sinta na mesa huntu”.
E komentarionan a pasa riba e promé dia di konferensia, ku ta terminá djadumingu. E delegashon merikano ta enkabesá pa sekretario di Defensa James Mattis i ta inkluí e asesor di Seguridat Nashonal H.R. McMaster i direktor di CIA Mike Pompeo. Algun di e partisipantenan ta: e promé minister irakí Haider al-Abadi, presidente ukraniano Petro Poroshenko i e ministernan di Relashon Eksterior di Rusia, Iran i Turkia.
