GINEBRA, AP.- E agensia di Nashon Uní pa derechonan Humano a ekspresá su preokupashon pa e eroshon di garantia básiko, violensia kresiente i “skarsedat grave” di kuminda, medisina i produktonan básiko na Venezuela.
Zeid Ra’ad al-Hussein, hefe di ofisina di derechonan humano di Nashon Uní a ekspresá preokupashon, ku e reportahenan di e protestanan kresiente pa eksigí akseso na kuminda, detenshon di manifestante i uso eksesivo di forsa kontra manifestantenan den último simannan.
E ofisina ku sede na Ginebra a pidi outoridatnan venezolano pa sigurá derechi di libertat di ekspreshon i reunion pasífiko ku ta un faktor pa yudansa humanitario pa sigurá e distribushon di alimento i medisina.
E fin di siman aki, gobièrnu di Venezuela a habri su frontera ku Colombia, despues ku esaki tabata será durante un temporada largu. Mas di 100.000 venezolano a krusa frontera pa kumpra produktonan básiko, meimei di un krísis ekonómiko i un inflashon di 700% anual.
