NASHON UNI, AP.- E Organisashon di Nashon Uní ta bisa ku mester hasi “muchu mas” pa atendé ku su propio partisipashon den aparishon di kólera na Haiti i den sufrimentu di esnan afektá, ku ta keda kalkulá na 770.000 persona.
Investigadornan ta bisa ku tin evidensia amplio ku kólera a paresé den e riu prinsipal di Haiti den òktober na aña 2010 debí na awanan residual di kampamentu di un mishon di pas di Nashon Uní. E organisashon mundial no a aseptá responsabilidat i a ampará bou di su inmunidat diplomátiko kontra demandanan presentá den Merka bou di nòmber di e víktimanan.
Ku su komunikado, refiriendo na su “propio partisipashon”, Nashon Uní a aserká un tiki mas pa atmití maske ta algu di responsabilidat. E bosero di Nashon Uní, Farhan Haq, a manda e mensahe pa The Associated Press djaweps. E mensahe a keda bon risibí pa abogado di e víktimanan.
Haq a bisa ku Nashon Uní ta konsiderando un serie di opshon i un serie di akshon di parti di Nashon Uní i ta keda presentá públikamente den próksimo lunanan.
