BEIRUT, AP.- E funshonario prinsipal di Nashon Uní na Siria a eksigí akseso humanitario inmediato i inkondishonal na míles di persona den kuater bario, atvirtiendo ku nan ta sufri di hamber.
Mester permití akseso na Madaya, Zabani, Foua i Kafraya, segun e koordinadó residente di Nashon Uni, Yacoub El Hilo, na Damasco. Madaya i Zabadani, pafó di e kapital, ta rondoná pa forsanan partidario di gobièrnu. Rebeldenan ta blòkia Foa i Kafraya, na nortwèst di e pais. E siudatnan ta bou rondoná pa forsanan di gobièrnu i rebeldenan desde aña pasá, i e konvoinan ku kuminda i remedi kasi no ta yega den e áreanan. E entrega mas resien tabata den aprel.
Médikonan Sin Frontera ta bisa ku 16 persona a muri na Madaya den yanüari debí na e kondishonnan kreá rondó di e pueblo i apesar ku esaki a risibí yudansa.
El Hilo a bisa ku Nashon Uní “ta atendiendo ku e partinan impliká pa sigurá ku esaki no ta bolbe pasa”
A pidi e kombatientenan pa permití evakuashonnan médiko. Aktivistanan na Madaya a kuminsá un kampaña pa evakuá e periodista Abdelwahab Ahmad, hospitalisá un siman pasá ku herida di bala.
Ahmad a pidi atenshon riba e sitio di e siudat den desèmber i su imágennan i videonan di algun mucha den e siudat a provoká indignashon rònt mundu.
