GENEVA, SUISA, AFP.- E Komisario di Derechi Humano di Nashonnan Uní a bisa ku e ta “den shòk” pa e masakre di sentenáres di sivil na wèst di Etiopia i a pidi outoridatnan pa un investigashon rápido i imparsial.
Den un komunikado, Michelle Bachelet a pidi outoridatnan etiope pa “realisá investigashonnan rápido, imparsial i profundo di e atakenan ku a provoká morto di sentenáres di persona”, na wes di Etiopia fin di siman.
Nashonnan Uní a bisa ku segun testimonionan, un grupo di individual armá a drenta pueblo di Tole riba 18 di yüni mainta i a kuminsá tira.
Segun informashon disponibel, nan a mata sentenáres di persona, den su mayoria muhénan i muchanan, obligando kasi 2.000 pa hui di nan kasnan. E atakantenan a sende vários kas na kandela durante e asalto ku a dura kuater ora.
“Mi ta den shòk pa e matansa sin sentido i desplasamentu fòrsá di e pueblo lokal durante e atake di pueblo Tole”, segun indikashon di Bachelet.
Segun Nashonnan Uní, un kantidat no determiná di persona a wòrdu sekuestrá durante e atake.
