NASHONNAN UNI, USA.- Konseho di Seguridat di Nashonnan Uní ayera a renobá pa un aña mas e sanshonnan riba algun aktor prinsipal dje violensia na Haiti, entre otro e prohibishon di biahe i kongelashon di nan fondonan finansiero.
E 15 miembronan dje Konseho a aprobá di forma unánime e resolushon nobo presentá pa Ecuador i Merka, ku ta hasiendo esfuerso pa kontrolá e violensia serio di gèngnan i restablesé seguridat den e nashon karibense ku ta batí pa un krísis.
Haiti ta konfrontá un krísis humanitario sin presedente, ku a bira pió den febrüari ora ku vários gèng kriminal a uni pa tumba e gobièrnu dje impopular promé minister Ariel Henry.
E gruponan ei fuertemente armá ta keda akusá di asesinatonan, violashon i sekuestro, partikularmente den e kapital Port-au-Prince, un violensia ku a pone ku mas di 700.000 persona a hui for di nan kas pa buska refugio na otro partinan dje pais.
Na kuminsamentu dje luna’ki, miembronan dje gèng Gran Grif a laga mas di shen morto den atakenan kontra e poblashon di Pont Sondé, den e área Artibonite.
Den e resolushon adoptá, e komunidat internashonal ta komprometé su mes pa tuma e medidanan nesesario pa impedí e tráfiko ilegal, e suministro, benta òf transferensia direkto òf indirekto di arma pa Haiti.
A keda probá ku apesar dje embargo, arma a sigui yega Haiti for di prinsipalmente Florida, Merka, ounke tambe via di Rep. Dominicana i Jamaica.
E a pais afrikano Kenia a aportá ku mas di 400 polis na Haiti komo parti dje grupo multinashonal ku mester yega na 2.500 efektivo. Siman pasá Kenia a primintí di manda otro 600 polis.
