BRUSELAS, AP.- NATO a duna Bosnia-Herzegovina lus bèrdè djárason pa avansá den un proseso di inkorporashon den e aliansa militar mas grandi na mundu. Serbio-bosnianonan ta oponé kontra e inisiativa aki.
E kansiernan di NATO reuní na Bruselas a invitá e pais balkániko pa presentá su promé programa anual di reforma ku intenshon di ahustá na e aliansa.
E proseso ta yuda e paisnan aspirante pa prepará pa bira miembro. “Nos ta dispuesto na aseptá e representashon di e promé programa nashonal anual di e pais. Esaki ta inkluí medidanan práktiko relativo na e reforma polítiko, ekonómiko i di defensa, kual lo yuda ku preparashonnan pa miembresia”, asina e sekretario general di NATO Jens Stoltenberg, a bisa na prensa.
Esaki ta nifiká ku Bosnia lo drenta den un futuro serkano i no ta kla si Sarajevo lo aseptá e invitashon pa inisiá e proseso.
“Nos a tuma nos desishon. Nos ta dispuesto na risibí su promé programa nashonal anual. Pero nan mester disidí i nos lo prepará ora nan ta kla pa esaki”, asina Stoltenberg a indiká.
Bosnia a sufri un guera sivil den dékada 1990 despues di e divishon di Yugoslavia. Su gobièrnu federal ta integrá pa representante di komunidatnan musulman, kroata i servio.
