BRUSELAS, BELGIKA, AFP.- NATO i Union Europeo a ekspresá nan deseo pa traha ku e presidente elekto di Merka, Joe Biden, pa reforsá lasonan ku Merka, segun indikashon di e hefe di Aliansa Atlántiko.
“Nos ta spera di por traha ku e presidente elekto Joe Biden pa fortalesé e relashon entre Merka i Europe ya ku nos ta enfrentá desafionan global ku nos niun no por konfrontá sin yudansa”, asina Jens Stoltenberg a tweet.
E eks promé minister noruego a hasi e deklarashonnan despues di un sena di trabou ku e presidente di Konseho Europeo, Charles Michel, i e hefe di diplomasia europeo Josep Borrell, un dia promé ku inougurashon di Biden komo presidente di Merka.
Stoltenberg a invitá Biden pa partisipá den un kumbre di NATO, pero ainda no tin un fecha pa esaki. Michel a proponé pa organisá un reunion ku e futuro mandatario merikano.
NATO i Union Europeo tin nan sedenan prinsipal na Bruselas. E meta ta pa organisá ámbos reunion den e mesun periodo, segun indikashon di un fuente diplomátiko.
