WILLEMSTAD.-Kambio di aña a transkurí bastante trankil aki na Kòrsou, kompará ku otro paisnan. Algu ku a hala atenshon e aña aki ta e negoshinan ku a sera nan porta òf ku a anunsiá ku nan ta bai stòp nan operashon dentro di poko. EXTRA a tuma nota di e ‘Hong Kong dry cleaning’ na entrada di Otrobanda, un empresa di 62 aña ku a sera su portanan. Hendenan di e área di Otrobanda i pabou di brùg di 35 aña òf as sigur ta kòrda e empresa aki. Hong Kong dry cleaning a sera su portanan 31 di desèmber último.
Otro negoshi ku tambe a hala nos atenshon pa nan anunsio di ta bai stòp nan operashon ta Rituals i tambe Super Kidz ámbos den Zuikertuintje Mall.
Den kaso di Super Kidz ta trata di un negoshi ku a sirbi e komunidat aki durante di 17 aña. E kompania ta yama danki pa e sosten durante di e tur e añanan i ta indiká ku lo por sigui kumpra merkansia serka nan pero online.
Rituals Curaçao ta otro negoshi ku ta kai bou di mesun paraplü ku SuperKidz esta Super Retail Holding. Rituals a eksistí 10 aña aki na Kòrsou i a sera su portanan 31 di desèmber último. E kompania ta rekomendá esnan ku ke sigui kumpra nan merkansia pa hasi esei online. No ta konosí kua ta e posibel motibunan ku e negoshinan ta sera e pakus físiko, pero ta sigui bende online.
Na otro áreanan di Kòrsou tambe por a tuma nota di algun negoshi ku a sera asta promé ku fin di aña. E investigashon ta sigui pa yega na un análisis mas kompletu.
