Fullinck chef di gabinete minister di SOAW
WILLEMSTAD.- Djaluna i djamars partido KEM i miembro independiente di parlamento, Zita Jesus-Leito a hiba deliberashonnan separá ku e tim negoshadó di partido MFK pa yega na un “addendum” (un dokumento adishonal) den kua ta deskribí bou di kua kondishon KEM i Jesus-Leito ta sostené e akuerdo di gobernashon di gabinete Pisas II.
Ta spera ku pa medio sèptèmber ta kla i ku por tin e akto ofisial pa firma e dokumentonan konserní i duna un presentashon di e kondishonnan bou di kua KEM i Jesus-Leito ta sostené gabinete Pisas II. Djaluna a toka turno na partido KEM pa a hiba deliberashon ku e tim negoshadó di MFK.
KEM di su banda a entregá su puntonan ku e ke mira atenshon pe den e akuerdo di gobernashon. MFK di su banda, asistí pa funshonarionan di ofisina di akountent SOAB a duna un presentashon di e akuerdo di gobernashon i kiko tur a logra te ku awor.
Djamars a toka turno pa Jesus-Leito ku a sinta ku e tim di MFK. E miembro independiente di parlamento a bisa riba su página sosial ku e tambe a entregá tur su puntonan na e tim negoshadó. Algun di e puntonan mas importante tin di aber ku integridat, transparensia i komunikashon ku pueblo, Jesus-Leito ta bisa.
Mas aleu el a trese dilanti ku e ta den proseso pa haña e kandidato adekuá pa okupá e puesto di minister di Desaroyo Ekonómiko. Tambe ku e ta den kontakto ku ministernan di gabinete Pisas II pa asina e ta na haltura di tur loke ta pasando.
Fullinck
Lider polítiko di KEM, Michelangelo ‘Low’ Martines a anunsiá entretantu ku awe djárason 28 di ougùstùs Konseho di Minister lo trata e proposishon pa nombra Jason Fullinck komo chef di gabinete di minister di Desaroyo Sosial, Labor i Bienestar (SOAW). Minister Javier Silvania (MFK) lo ta temporalmente enkargá ku e kartera di SOAW tambe.
E nombramentu di Fullinck ta a base di un palabrashon entre KEM i MFK ku miéntras ta warda e proseso pa “screen” kandidatonan pa bira minister ku e dos partidonan huntu ta karga responsabilidat pa maneho di Ministerio di SOAW huntu. Esaki pa evitá ku ta tuma desishonnan ku no ta kuadra ku e pensamentunan di KEM.
Tambe for di ayera MFK i KEM a kuminsá pidi tur dokumento den kuadro di traspaso di maneho di e ministerio. Un traspaso formal lo no a tuma lugá despues ku a surgi un kiebro den e koalishon di MFK i PNP siman pasá djárason.
Informashon no konfirmá asta ta indiká ku Fullinck lo ta e kandidato di KEM pa bira minister di SOAW den futuro serkano. Fullinck te ku resien tabata presidente di partido KEM. Tambe e ta presidente di e Plataforma di Sklabitut i herensia di Sklabitut.
Pa mas tardá fin di e siman aki ta spera ku tantu KEM komo Jesus-Leito ta entregá nòmber di 2 kandidato pa e puestonan di minister di SOAW i Desaroyo Ekonómiko.
Foto:
…Jason Fullinck…
