JERUZALEM, ISRAEL (AFP).- E promé minister israelí, Benjamin Netanyahu, ayera a duna di konosé ku e fase “intenso” dje peleanan kontra di Hamas den e siudat di Rafah, den zùit di Gaza, ta yegando na su fin. Den wikènt último e bombardeonan a sigui den Gaza despues di ocho luna di guera kontra di Hamas.
Djadumingu último, e minister di defensa di Israel, Yoav Gallant, a yega Merka pa hiba kombersashon krusial riba e konflikto, na un momento ku tin algun diferensia di opinion entre White House i e gobièrnu di Netanyahu.
Netanyahu a anunsiá den un entrevista ku e kadena israelí Canal 14 ku “e fase intenso dje kombatenan kontra di Hamas ta yega na su punto final. “E ta serka di kaba. “Esei no ta nifiká ku e guera ta bai kaba, sino ku e guera den Rafah t’esun ku lo stòp”.
‘Despues dje parti intenso aki, nos por manda nos forsa militar parti nort, i esei ta lokual nos lo hasi”, segun e promé minister, i a agregá ku e meta dje ofensiva ta pa reskatá rehennan kapturá pa Hamas durante e atake di 7 di òktober i kaba ku e gobièrnu dje movementu islamita Hamas”.
Puntra kiko lo pasa ku Gaza despues dje guera, Netanyahu a indiká ku “ta bon kla ku Israel lo mantené kontròl militar riba Gaza den futuro”.
“Tambe nos ke krea un gobièrnu sivil, si ta posibel ku palestinonan lokal” i un respaldo regional “pa gestioná e suministro humanitario i mas despues e asuntu di sivilnan den Gaza”, segun Netanyahu a agregá.
Seguidamente Netanyahu a hasi un yamada riba Merka, su aliado prinsipal, pa aselerá e proseso pa manda arma i munishon pa Israel, despues di a kritiká ku esaki a tarda hopi durante di último lunanan.
Netanyahu a sigurá su gabinete ku e “desakuerdo” ku Washington, ku a kritiká e kantidat di morto di sivilnan palestino den Gaza, lo keda resolvé. “Di loke m’a tende e último dianan, mi ta spera i kere ku e punto aki lo keda resolvé”, segun e mandatario israelí.
El a sigurá ku Israel su relashon ku Merka ta mas importante ku nunka promé i ku nan reunionnan ku funshonarionan haltu norteamerikano ta krusial pa e guera.
