Vários protestando kontra Promé Minister di Israel Benjamin Netaynahu
NASHONNAN UNI, MERKA, AFP.- Promé minister di Israel, Benjamin Netanyahu, a tene un diskurso kombativo dilanti di ONU djaweps, den kua el a ataká tantu su atversarionan komo su aliadonan. Esaki a kousa hopi konmoshon den Asamblea General.
Netanyahu a probechá di e tribuna di Nashonnan Uní pa ataká desde lidernan di Iran te ku e promé alkalde musulman di New York, komo tambe su aliadonan Reino Uní, Fransia i Turkia.
Desena di delegadonan di diferente parti di mundu a bandoná e sala di Asamblea. Algun a sali bou di gritu di desaprobashon i burla, miéntras ku e propio ekipo di Netanyahu a lanta para pa aploudí. E Presidente di e seshon mester a pidi pa mantené òrdu den e sala.
“Si tin otro kobardenan moral ku ainda no a bandoná e sala aki, hasi esaki awor”, Netanyahu a bisa ora el a tuma palabra.
El a ataká e alkalde popular di New York, Zohran Mamdani, yamando e “antisemita” i afirmando ku “desde ku el a keda skohé komo alkalde di e estado, hopi hudiu no ta sinti nan mes safe mas”.
Mamdani a menasá ku ehekushon di un órden di detenshon di Korte Penal Internashonal (CPI) kontra Netanyahu, promé ku el a atmití ku e no tin outoridat pa hasi esaki.
CPI, ku tin su sede na Den Haag, a determiná na 2024 ku por konsiderá Netanyahu komo responsabel pa krímennan di guera durante e atake militar israelí na Gaza. Esaki a kuminsá komo reakshon riba e atake mortal di Hamas riba 7 di òktober 2023.
Oumentando tenshon, desénas di manifestante, algun ku bòrchinan ku ta bisa “para e genosidio”, a reuní serka di Nashonnan Uni. Polis a detené vários di nan, entre nan e aktor di Hollywood Susan Sarandon.
Promé minister di Israel Benjamin Netanyahu
Outoridatnan deteniendo e aktris Susan Sarandon i otro manifestantenan pro-palestina pa motibu ku nan tabata blòkiando un avenida serka di e edifisio di Nashonnan Uni.
