JERUZALEM (AFP).- E promé minister israelí, Benjamin Netanyahu, a duna di konosé ku “pa awor akí” e guera ta sigui kontra di Hamás den e franga di Gaza, pa impedí ku e movementu islamita palestino por “rekonstruí”.
“Si awor akí nos stòp e guera, Hamas lo bolbe lanta, lo e rekonstruí i bolbe ataká nos, i esei ta loke nos no ke pa sosodé”.
Despues dje atake sin presedente dia 7 di òktober di 2023 di parti di Hamas den zùit di Israel, Netanyahu a primintí na distruí e movementu islamita i su ehersito a lansa un ofensiva devastador den e teritorio palestino.
“Nos a pone komo meta e likidashon di Hamas, e eliminashon di su kapasidatnan militar, pa nan no por restablesé pa e katastròf di 7 di òktober no ripití”, segun Netanyahu a bisa.
“E aislamentu di Hamás ta ofresé un oportunidat nobo pa hasi avanse den un akuerdo ku lo trese nos rehennan bèk”, segun el a bisa mas aleu.
Ademas dje 1.206 mortonan israelí den e atake di 7 di òktober, tambe Hamás a sekuestrá 251 persona den e teritorio israelí. Un kantidat di 96 ta sigui komo rehen den Gaza, entre nan 34 ku a keda deklará morto
Netanyahu djadumingu a reuní ku famianan dje rehennan i a duna di konosé ku “e kaida di régimen Al Asad (presidente sirio), ku a sosodé danki tambe na akshonnan determiná di Israel kontra di Hezbola i Hamas, por yuda pa avansá den direkshon di un akuerdo pa regreso dje rehennan.
E negosiashonnan di un aña kaba pa un tregua i liberashon dje rehennan i prezu na Palestina no a duna resultado.
E atake israelí a kousa 44.758 morto den Gaza, den su gran mayoria sivilnan, segun datonan konsiderá komo konfiabel di parti di Nashonnan Uni.
