NEW YORK (AFP).- The New York Times a publiká ayera di a demandá Pentagon pa motibu di a implementá un seri di medida restriktivo pa prensa, kualnan e korant ta konsiderá komo no konstitushonal. Departamento di Defensa, batisá algun siman pasá komo ‘Departamento di Guera’ pa e gobièrnu di Trump, a enduresé di forma drástiko su kontròl riba prensa.
Varios medio norteamerikano komo tambe internashonal, manera e agensianan AP i AFP, e kanal Fox News i e propio The New York Times, den luna di òktober a nenga na firma un regla nobo di Pentagon ku ta establesé restrikshonnan nobo den nan trabou. Por ehèmpel, Pentagon a pidi periodistanan akreditá pa no buska ni publiká sierto informashon sin outorisashon eksplísito, bou dje riesgo di pèrdè akreditashon.
Den su demanda den un tribunal di Washington, New York Times a argumentá ku usando e reglanan ei gobièrnu ta violá e Promé Enmienda di Konstitushon di Merka, ku ta garantisá libertat di ekspreshon. E gobièrnu “ta buska pa restringí e kapasidat di periodistanan pa hasi loke semper nan a hasi: hasi pregunta na empleadonan di gobièrnu i rekopilá informashon pa informá di susesonan ku ta bai mas leu ku deklarashonnan ofisial”, segun e demanda di Times.
