Monifa Jansen a habri su mes ku nos. E kier pa konosé e Monifa, hoben tímido ku a lucha, bai tras di loke semper el a kere aden i ta logrando su soño. Monifa ta hopi den publisidat. E ta e reina di Social media i ta e mesun Social Media aki hopi a usa pa purba kibr’e. Pero manera el a bisa nos di Djasabra, e tabata fuerte manera betòn i ounke a purba niun a logra. Monifa ta kosechando éksito tras di éksito den eksterior, ku diferente tour, casting, modelahe i hopi mas. I nos tei konosé Monifa mas di aserka.


2012…

Na 2012 Monifa Jansen a sali Miss Universe Curacao. Di einan Monifa a sigui krese internashonalmente. Monifa a yega asina leu ku e aña aki el a presentá su propio kolekshon di trahe di baño huntu ku Linamalco. Monifa ta sintié un embahador pa Kòrsou i e ta spera ku Kòrsou tambe ta mir’e asina. Ken por kere ku un hoben asina tímido por subi esenario, den trahe di baño i mustra mundu ken e ta.

 

Estudio di lei….

Despues di a kaba skol, Monifa a bai studia lei. El a kaba e promé aña di lei aki na Kòrsou, pero a tuma pouze un ratu. Komo e tabatin asina tantu gana i pashon pa otro kos el a ripara ku e estudio tabata kita muchu tempu di dje. E sa ku su estudio ta importante, pero e kier a hasi otro kos den su bida na e momentu ei. E ta spera ku kisas aki algun aña e por kaba ku su estudio di lei. E no ta haña ku el a tuma un desishon robes, den e etapa di su bida ku e ta.


Nervioso….

“Meskos ku tur hende, ora mi ta riba pasarela mi ta nèrvioso. Hende ta wak bo, lus kámara i naturalmente hende ta nèrvioso. Pero bo a bai pa algu. Ta loke bo tin pashon pe, loke bo tin gana di hasi. Ami ta purba hasi mi bèst kada bes riba pasaerela, mi a bai te einan i mi ta duna 100% di mi. Ora bo bai e kompetensianan manera miss Universe i tambe Swim Week, ta diferente hoben di diferente parti di mundu ta einan, i nan tin eksperensia di pasarela i abo no ta úniko. Pero bo tin di mustra ku bo tei ku bo bagage i bo tei pa logra”, Monifa a konta Djasabra.


Mundu internashonal a kuminsá…..

Promé ku Miss Curacao na 2012, ya Monifa tabata modelá. Aki el a kuminsá ku gana su eksperensia riba pasarela. El a partisipá na diferente show di moda ku e rumannan Hasham. Tambe el a hasi diferente Photoshoot. Semper e tabata tende e komentarionan, dikon e no ta bai pa miss Kòrsou. Hopi ta konsiderá su estatura haltu, e ta deportista i tin e ingredientenan ideal pa bai un elekshon di beyesa. Monifa sinembargo tabata wak e otro, e no tabata sigur di su mes. Te ora Aubrey Amérika a aserk’é pa e partisipá den Miss Korsou. El a papia ku su mama i tata i nan a apoy’é pa e bai. I esei tabata su introdukshon na e mundu internashonalmente.

 

I ku yudansa di social media, tur e kosnan ku e ta hasiendo a bira posibel.  Monifa tin un plataforma basta ekstenso riba Social Media, den e kaso aki Instagram i hopi promotor internashonal, agensia i diseñadónan internashonal ta interesá den dje. E tin e ‘followers’ riba Instagram i esei ta interesante pa tur ku ta kere den dje. Monifa ta mirá komo un selebridat.

 

Un hoben tímido….

Monifa ta kalifiká su mes komo un hoben poko tímido. I p’esei tur loke presentá su dilanti e ta wak bon. Hopi hende no por imaginá nan mes ku e ta tímido. Di otro banda e tabata sa ku  timides bo no ta yega niun kaminda. Si bo tin gana di hasi algu, mihó hasié i no skonde.

 

Djis un shòt pa kita nèrvio…

Apesar di su timides, el a subi pasarela internashonal. Monifa, ku un sonrisa riba su kara a bisa nos di Djasabra “Mi ke konta algu, no pa enkurashá niun hende pa hasié, pero promé ku mi subi pasarela mi ta dal un shòt.  E shòt chikitu ei ta yuda mi kita poko di e nèrvio. Mi no ta bebe pa bira fuma pero simplemente pa por dominá mi nèrvio”. El a ripara ku mayoria hende internashonal ku e konosé, ta hasi meskos, pa asina nan por dominá nan mes mihó dilanti multitut di hende.

 

Monifa ku trahe di tape….

E aña aki tabata promé aña tambe ku el a partisipá den e trahe di tape na e Miami Swim Week. Monifa a konta Djasabra ku e konosé e persona tras di e show aki i el a partisipá na diferente di su aktividatnan. I den e kaso e aña aki,  e persona ei mes a yam’e pa e  por tuma parti na e show ku trahe di tape. “Bo kurpa mester ta on tòp pa por bisti e trahe traha di tape ei. I mi a bisa e persona ku mi no sa ku mi ta ready, pero el a bisa mi ku mas ready mi no por bira”.

 


Kurpa den shape….

I pa Monifa tene su kurpa den shape e ta hasié losiguiente; Por ehèmpel promé ku el a bai e kompetensia di trahe di baño na Miami, su kurpa tabatin hopi vògt. I e mester a sòru bebe kosnan sappig i no líkido. Por ehèmpel kompota natural. Tabata djis muha su lep. Pero por lo general e ta bai gym i tene su kurpa den kondishon. Teniendo na kuenta ku Monifa hopi biaha ta den avion, el a bisa nos ku esei tambe ta mishi ku su forma di kome. P’esei e ta èkstra kuidadoso kiko e ta kome. E ta lanta mainta i e ta kana i tene su kurpa den kondishon. Ora e ta biaha e ta baha hopi di peso pasobra e ta move hopi. Tin biaha teniendo na kuenta e destinashonnan largu ku e tin di bai, e ta lubidá mes pa kome i tur esei ta pone ku e ta baha mas di peso ainda. “E ta hopi stresfull si”.

 


Casting….

Monifa a splika ku ‘casting’ ta e parti mas difísil di su trabou.  Ta henter un dia bo ta keda besig. Den ‘casting’ ta hopi hende ta bin i bo tin di pasa den ‘screening’, nan ta habri bo file di bida, e ta eksihí hopi. Ku kada diseñadó ku bo traha, ta habri mas porta pa bo, pasobra ya nan sa di bo. I ounke e ‘Casting’ ta pisa, e ta algu ku Monifa ta gusta.

 


Propio liña di zuèmpak….

I den tur e trabounan aki, Monifa tin su liña di zuèmpak ku el a traha ku un marka di LA den e kaso aki Lanimalco. Den pasado el a yega di promové trahenan di baño pa e marka aki kaba i kier a traha un kolekshon karibense. Monifa mes a diseñá, skohe su kolonan, el a skohe kolonan ku ta pusha otro afó. Ta kolonan ku bo normalmente ta dal pisa kontra otro pero ku tòg por traha ku otro. El a promové e trahenan usando paisahenan di Kòrsou. I e kolekshon a ‘sold out’ te ku awor ke saka un kolekshon di nobo pero ku otro diseño.

 

Su propio ‘brand’….

Ounke intenshon ta ku un dia e lo bai kaba su estudio di lei, Monifa ta dirigí  aktualmente riba su karera di modelá i presentashonnan. Loke e ke yega na dje ta pa su nòmber ta un ‘brand’. Hopi hende ta bin ku nan mes marka i einan Monifa ke yega. E ke krea algu  i e tin pensa di kuminsá ku su mes liña di paña i asina sigui ekspandé su mes.

Monifa ta sintié un embahador pa Kòrsou i p’esei ora e ta saka potrèt, ki ora e tin un oportunidat e ta sòru pa tin paisahenan di Kòrsou den su potrètnan. E no sa ku Kòrsou den e kaso aki ta mir’e komo un embahador pero e ta sintié asina. E ta propagá Kòrsou den eksterior unda ku e bai.

 

No tabata fásil na prinsipio…

“Dia mi a kuminsá mi no tabatin’e fásil. Tabata un kos nobo, e modelahe i mi tabata un di e proménan ku promoshon riba Social Media i mi tabatin’e poko lastig. Si mi ke ta un ehèmpel pa hóbennan, mi por bisa nan pa no kibra pasobra hende ta bisa ku bo no por, pero sigui lucha. Si mi a bai tras di hende pa legumai e kos aki, lo mi a keda den un huki pa komplasé hende”, Monifa a enfatisá. Pero el a pone pia abou i bisa “e kos aki mi ke i ni maske kiko nan bisa di mi, i nan a yama mi hopi kos, ta esaki mi ke. I awe tur esnan ku a papia tras di mi lomba a ripara ku tur loke nan a papia mi no a kibra i nan mes ta bisa awor ku e mucha aki ta fuerte, e tin forsa si pasobra tur loke nan a papia di dje tòg e no a kibra”.  I esei ta e konseho ku e por duna e hóbennan pasobra ta netamente ora bo ta hoben nan por kibra bu mas fásil.

Esaki pasobra si nan no a logra algu, nan no ke pa bo tampoko logr’e i nan ta purba kibra bu i ora bo kibra nan ta bisa ku ta esei nan kier a bisa bu. Nan no ta duna bu un man pero ta purba si pa kibra bu. Pa menshoná hende ku a dun’é un man pa yud’e e lista lo ta kòrtiku pero pa traha un lista di esnan ku a purba kibr’e si e listra lo ta masha largu. “MI mes no por imaginá mi mes ku mi ta te aki nan. Mi ta un mucha di Seru Fortuna, kolo skur i tur hende tabata yama mi mahos semper, kar’i kabai, travestí i tur tipo di kos, no ta kos ku mi no a mira nunka, ta kosnan ku mi a mira riba Facebook i mi por a kibra. No tabata nada leuk loke nan tabata bisa di mi, nan a yama mi golddigger, escort ta masha hopi kos ku un hende lo kibra fásil pero mi no a kibra i nan tin di bin ku prueba i niun hende por a bin ku esei. Mi a sigui primi i basta mi mama ku mi tata ku ta e hendenan mas importante pa mi a kere den mi, sobra no ta importá”, Monifa a enfatisá.

Pero nada di loke nan a bisa di dje i niun hende ku a purba kibr’e e no a sinti falta di dje. Ta bon ku e hendenan a mustra nan kolo di bèrdat i el a sefta ken ta kuné. I ora bo wak bon e  hendenan ei mes no a logra nada i p’esei nan por papia i esei so nan por hasi. No ta hende ku por duna bu un man nunka.



Usa social media no pa kibra otro….

Pa loke ta social Media, Monifa a bisa ku voral na Kòrsou i mas tantu Facebook hende ta usa pa kibra otro. Ta skibi kos i hasi chèrchè di hende i esei no ta e intenshon.  Ta mihó buska manera di traha sèn riba social media i no chèrchè hende. E ta kere esun ku tin negoshi na Kòrsou mester buska un hende ku tin Followers i hende ku sa mihó, un bon fotograf i us’e na forma positivo pa yuda bo interes enbes di kibra otro.

 

Den e era awor aki, sin social media ta ‘Imposible’. Den kualke negoshi, kualke tereno social media ta importante . I invertí den bo mes, buska un fotograf i e manera ku bo ke pa hende mira bu hasié i bai den e direkshon ei. Nos ta biba den e mundu di viewers i mester invertí pa yega asina leu.  Hasi uso di social media di forma positivo i kere den bo mes pasobra semper tin hende pa kibra bu.

 

 

LAGA UN KONTESTA

Please enter your comment!
Please enter your name here