SAN JOSE, COSTA RICA (AFP).- Kongreso di Nicaragua a aprobá pa kuminsá husga esnan ku ta kometé akshonnan kontra di gobièrnu di Daniel Ortega den eksterior, un desishon ku segun oposishon lo keda usá komo “èrmènt di represhon pafó dje pais”.
Un reforma na e lei penal aprobá pa unanimidat ta imponé kastigunan di te ku 30 aña di prisòn pa esnan ku promové sanshonnan kontra e gobièrnu di Managua, un delito tipifiká komo “menospresio di integridat nashonal” di kua e interpretashon ta keda den man di tribunalnan, kual meskos ku kongreso ta kontrolá pa Ortega.
E lei, ku ta konta pa tantu nikaragwense- komo estranheronan, ta inkluí e posibilidat pa konfiská propiedatnan i a keda aprobá e mesun dia ku Nashonnan Uní a atvertí pa un deterioro grave di derechinan humano na Nicaragua for di aña pasá, ku oumento di detenshonnan arbitrario, persekushon i maltrato.
E lei, ku lo drenta na vigor una bes e keda publiká den korant ofisial, ta establesé tambe ku por sanshoná empresanan i organisashonnan sosial.
Gobièrnu di Ortega a hasi mas fuerte e leinan di represhon despues dje protestanan opositor di 2018. For di despues di esei a sera alrededor di 5.500 organisashon bou dje argumento ku nan no ta reportá nan estado finansiero. Nan propiedatnan a keda konfiská.
