SAN JOSE, COSTA RICA.- Nicaragua ayera a revoká nashonalidat i a konfiská propiedatnan di un grupo nobo di eks-detenidonan polítiko, un total di 135 persona ku pa mediashon di Merka siman pasá a keda mandá pa Guatemala.
E medida a keda anunsiá pa e poder hudisial, señalando di ta na servisio dje gobièrnu di Daniel Ortega i su kasá, e vise presidente Rosario Murillo, ku a oumentá e represhon for di despues dje protestanan di 2018, segun Nashonnan Uní.
Un tribunal di Managua a ordená e “pèrdida di nashonalidat nikaragwense na 135 persona, kondená pa susesonan deliktivo ku a atentá kontra di soberania, independensia i outodeterminashon dje pueblo nikaragwense” i “a disidí pa konfiská tur propiedat di esnan kondená”, segun un komunikado.
“Nos tabata sa ku algu asina por a tuma lugá, pero no asina lihé”, segun Pedro Gutierrez, un dje 135 eks-prezunan.
“Ta un gòlpi fuerte, nos a sinti ku un spada a pasa den nos kurpa i ta laga nos keda sin forsa”, segun Gutierrez, kende a konta di a keda detené dia 11 di febrüari di 2023 despues di un protesta solitario den Managua pa eksigí e liberashon dje obispu Rolando Alvarez.
Di su parti, e gobièrnu guatemalteko a bisa ku “e opshon di apliká pa asilo ku Guatemala ta ofresé ta keda mantené” pa e 135 nikaragwensenan. Tambe nan por skohe pa refugio pa Merka i otro paisnan.
Ku e desishon ei, a yega na 451 e sifra di opositornan nikaragwense ku a keda privá di nan nashonalidat for di kuminsamentu di 2023, segun e agensia di notisia AFP basando su mes riba datonan ofisial.
