E pareha presidensial di Nicaragua, Daniel Ortega (presidente) i su kasá Rosario Murillo kende ta ko-presidente.
SANTO DOMINGO (AFP).- Nicaragua ayera a sera su embahada na Rep Dominikana, meimei dje konflikto diplomátiko entre e dos paisnan despues di anunsio dje presidente nikaragwense Daniel Ortega di un reforma ku ta impedí partisipashon di opositornan den elekshon.
Gobièrnu dominikano dia 23 di yüli a yama su embahador na Managua pa konsulta i for di despues di esei e embahada a keda bou responsabilidat di un persona enkargá ku negoshinan. E mesun kos a sosodé ku e representashon nikaragwense na Santo Domingo.
“Ministerio di Relashonnan Eksterior di Rep. Dominikana a tuma nota dje desishon di e gobièrnu di Nicaragua pa sera su embahada na Santo Domingo”, segun kansieria dominikano a bisa den un komunikado. E siere dje embahada a tuma lugá algun dia despues ku e Asamblea di Nicaragua a aprobá un reforma di konstitushon ku ta prohibí e partisipashon di opositornan den elekshon.
E diferensia entre e dos paisnan a kuminsá den luna di yüli ku e anunsio dje gobièrnu di Ortega enkuanto e reforma ku ta amplia e mandato presidensial for di seis pa shete aña i ta ekskluí dje elekshonnan esnan ku ta tuma parti na “gòlpi kontra di gobièrnu, traishon na patria” òf ku ta solisitá pa “intervenshon militar”.
E gobièrnu di derecha dje presidente dominikano Luis Abinader tambe a tuma distansia di Cuba, ekspulsá medio ougùstùs no ménos ku nuebe miembro dje embahada kubano i nan famianan, sin duna motibu pa esaki.
